Accessibility links

Breaking News

Etazini-Eleksyon : Eske Kandida Repibliken Donald Trump Pral Sede Anba Presyon pou l Kite Kous la?


Kandida repibliken Donald Trump (adwat) ak gouvènè Eta New Jersey a, Chris Christie.

Ozetazini, kandida repibliken Ben Carson deside kite kous la. Misye Carson di aprè eleksyon primè madi premye mas pase a – “Super Tuesday” ou
“sipè madi” kote te gen eleksyon nan 11 Eta e li pa ranpòte pa menm yon Eta- li pa wè okenn rezon pou l rete nan kous la toujou.

4 lòt kandida repibliken yo --Donald Trump, Ted Cruz, Marco Rubio ak John Kasich-- pral tope kòn yo nan yon deba nan sware jounen jedi 3 mas 2016 la. Misye Trump, ki devan nan kous la, genyen bon jan van nan vwal li aprè viktwa li te ranpòte nan seri eleksyon primè ki dewoule madi pase a; sepandan lap fè fas ak gwo efò opozan li yo ap deplwaye pou yo bloke kanpay li a.

Kandida demokrat nan prezidansyèl 2016 la, Hillary Clinton, pandan li tap salye kèk patizan.
Kandida demokrat nan prezidansyèl 2016 la, Hillary Clinton, pandan li tap salye kèk patizan.

​ Bò kote demokrat yo, kandida kap mennen nan kous la, Hillary Clinton, pa mete dlo nan bouch li pou l denonse taktik advèsè repibliken li yo ap anplwaye nan kanpay yo. Madam Clinton pran yon pozisyon klè kont ajisman kandida repibliken yo nan yon meeting ki dewoule mèkredi 2 mas la nan vil New York. Hillary Clinton di:

“Yap lonje dwèt sou anpil moun e yap manke anpil moun dega nan kanpay yo a. Gen moun ki kapab konprann se amizan; men, kite m di nou eleksyon se yon bagay serye. Lè w kandida pou plas Prezidan an, pawòl kap sòti nan bouch ou enpòtan anpil. Epi, lè w vin Prezidan menm, sa ou di ak mesaj wap mete devan lemond genyen anpil enpòtans.”

Madam Clinton, ki pale konsa, genyen pou l fè fas ak advèsè demokrat li a, Bernie Sanders, dimanch kap vini la a nan yon deba ki pral dewoule nan vil Flint, nan Eta Michigan, yon vil ki nan mitan yon kriz akoz dlo kontamine yon segman defavorize nan popilasyon an te bwè pandan yon bon bout tan.

XS
SM
MD
LG