Timoun ki degize pou Halloween te mèt bliye afè fete lakay Prezidan Biden jodia.
Prezidan Joe Biden ak premye dam Jill Biden ann Euwòp jodi 31 Oktòb la ki se Halloween Ozetazuni kidonk yo pap sou plas nan Lamezonblanch pou ede bay timoun bon bon ak lòt kado.
Olye de sa, Lamezonblanch, ki sitye sou Avnu Pennsylvania nan Washington, ap dekore ak limyè oranj nan l'onè fèt la, kote Ameriken renmen degize. Se sa pot pawòl premye dam nan Michael LaRosa fè konnen.
Se tap premye fèt Halloween fanmi Biden nan tap pase nan Lamezonblanch.
N'ap raple ke prezidan an ak madanm ni ap vizite Wom ann Itali a l'okazyon rankont o somè G20 an. Apre sa yo pral Glasgow, ann Ekòs pou rankont o some Nasyonzuni sou chanjman klimatik la COP26.
Ane pase a, Prezidan Donald Trump ak premyè dam Melania Trump te akeyi timoun ak paran yo nan Lamezonblanch kèk jou sèlman apre yo te refè de maladi kowonavirus la. Yo te sètoblije fè kèk chanjman nan selebrasyon an pou pran pandemi a an konsiderasyon.
Prezidan Trump ak premye dam nan pat distribye bon bon bay timoun yo pèsonèlman, men yo te salye timoun yo pandan yo tap defile devan yo. Timoun ki te gen plis pase laj 2 zan ak tout anplwaye Lamezonblanch yo te oblije mete mask nan figu yo epi pa kanpe sere sere. Anplwaye ki tap bay bon bon yo te mete gan tou.
Enfomasyon pou repotaj sa a soti nan Associated Press
Facebook Forum