Accessibility links

Breaking News

Oganizasyon Laprès yo Pwojte Joe Biden kom Venkè Eleksyon Prezidansyèl la


Joe Biden. Laprès pwojte li kòm kandida ki ranpòte eleksyon an.

Oganizasyon de près yo pwojte Joe Biden kòm kandida ki ranpòte eleksyon prezidansyèl la Ozetazini e li byen kapab pare pou l prete sèman kòm nouvo lidè ameriken nan dat 20 janvye pwochen.

Ansyen Vis Prezidan ameriken, Joseph R. Biden Jr., ki twouve l nan peyizaj politik ameriken an depi prèske yon demi syèk, jwenn pwojeksyon òganizasyon de près yo kòm kandida ki ranpòte eleksyon prezidansyèl la Ozetazini e li byen kapab pare pou l prete sèman kòm nouvo lidè ameriken nan dat 20 janvye pwochen. Konsa, a 78 tan, Biden ka tounen prezidan ameriken ki pi granmoun nan tout istwa peyi a.

Vrèman vre, òganizasyon nouvèl yo pwojte Biden kòm kandida ki ranpòte eleksyon an, kidonk li bat prezidan repibliken Donald Trump apre yon kanpay elektoral ki te chaje ak tansyon e apre responsab elektoral yo te pase kek jou ap konte vwa yo. Biden se yon lidè demokrat ki te pase 36 zan nan sena a epi 8 ane kòm Vis Prezidan sou administrasyon Barack Obama a. Otorite konsène yo toujou genyen pou yo sètifye rezilta yo, tandiske Pati Repibliken an genyen tout dwa li pou l defye rezilta sa yo nan tribinal; sepandan espesyalis yo prevwa pa pral genyen chanjman, rezilta sa yo ap rete rezilta final.

Pandan Joe Biden t ap reyaji sou pwojeksyon sa a, li ekri sou kont Twiter li yon mesaj li voye bay pèp ameriken an kote li deklare: ”Se yon onè pou mwen deske nou chwazi m pou mwen dirije gran peyi sa a.” Men sa mesaj la di mo pou mo:

Pèp ameriken: Se yon onè pou mwen deske nou chwazi m pou dirije gran peyi nou an. Travay k ap tann nou an se yon travay difisil; sepandan, men sa m pwomet nou: Mwen pral dirije kòm prezidan tout ameriken -kit nou te vote pou mwen, kit nou pa t vote pou mwen. Mwen pral respekte konfyans nou plase nan mwen an.”

XS
SM
MD
LG