Prezidan ameriken an, Donald Trump, sanble ap fè bak sou menas li te fè pou l fèmen yon gwo pati nan gouvènman federal la vè fen semèn sa a. Se enpresyon La Mezon Blanch bay lè li fè konnen kounye a prezidan an ap tann pou l wè ki konpwomi lidè repibliken ak demokrat nan Kongrè a kapab jwenn pou evite yon fèmti administrasyon piblik la.
Prezidan an mande palmantè yo vote 5 milya dola kòm lajan ki pou finanse yon miray li vle konstwi sou fwontyè amerikano-meksiken an; sepandan lidè demokrat yo ni nan Sena a ni nan Chanm Depite a deklare yo pa p vote pou bay lajan sa a. Si Misye Trump pa jwenn satisfaksyon, li difisil pou prevwa egzatteman si l pral kite gouvènman an fèmen, paske rive vandredi swa, a minui, yon ka nan tout biwo leta federal la pa p gen kòb pou yo fonksyone puiske bidjè yo ap fini.
Sa te vle di tou yon afè de 800 mil anplwaye federal t ap oblije rete lakay yo san travay e san touche; oubyen, si yo se anplwaye ki esansyèl pou sekirite peyi a ak pou sove lavi moun, yo t ap ale travay san yo pa konnen kilè y ap resevwa chèk yo.
Sarah Sanders, pòtpawòl La Mezon Blanch, di jounalis yo, nan apremidi madi 18 desanm 2018 la, gen lòt mwayen pou prezidan an jwenn kòb la; men li pa bay presizyon. An tou ka, daprè kèk obsèvatè, daklarasyon sa a vle di La Mezon Blanch pare pou l aksepte yon konpwomi epi evite fèmti gouvènman ameriken an.
