Lame a di defans anti-aeryen desann tout 25 dronn ke LaRisi te lanse nan atak la, ansanm ak 8 misil ki te baze nan lanmè, men ke debri ki tonbe te fè dega atè a.
3 moun blese lè debri te tonbe sou yon sipè-makèt, e yon dòtwa etidyan te donmaje tou.
Ponpye te konbat plizyè dife ki te pete akoz moso wokèt ki te tonbe yo, se sa gouvènè rejyon an, Oleh Kiper, di sou Telegram.
Epi 7 moun pou pi piti mouri, pami yo yon fi 23 lane, epi 22 lòt pou pi piti blese nan rejyon Kherson.
Yon lòt kote, Ministè afè etranjè Ikrèn kondane jodia sa li rele gwo vyolasyon kont lwa entènasyonal ke lamarin
LaRisi ta komèt lè yon bato ris te tire kout zam avètisman sou yon bato kago ki gen drapo peyi Palau, ki te sou wout pou ale nan pò Izmail nan Ikrèn.
Ikrèn ekzòte patnè li yo pou yo – n-ap site - "ranfòse efò pou prezève Akò Sereyal Lanmè Nwa a, ki enpòtan anpil pou sekirite alimantè mondyal". Fen sitasyon
