Yon lòt kote, otorite nan sid Ikrèn di jedi ke LaRisi lanse yon frap aeryen pandan lannwit la sou vil Mykolaiv ki gen yon pò, kote pou pi piti 19 moun blese.
Gouvènè rejyon an Vitaliy Kim di sou Telegram ke frap aeryen an touche sant vil la, e ke pami blese yo gen 5 timoun. Kim ajoute ke sekouris rale 2 moun anba dekonm.
Oleksandr Snkevych, ki se majistra Mykolaiv, di frap la donmaje pou pi piti 5 bilding plizyè etaj, ak yon pakèt garaj.
Nan Odesa, otorite yo di jedi yon frap ris touye pou pi piti yon moun.
LaRisi vize Odesa ak Mykolaiv nan atak aeryen plizyè fwa semèn sa a.
Moskou di li vize sèlman pozisyon militè nan Odesa, men pòtpawòl Konsèy Sekirite Nasyonal ameriken Adam Hodge apiye akizasyon Ikrèn ki di atak la detwi “enfrastrikti agrikòl ak 60-mil tòn sereyal” ki te pare pou ekspòtasyon.
Pandanstan, otorite ke LaRisi enstale nan Krime di yon dronn ke Ikrèn lanse touye yon moun e donmaje plizyè bilding administratif nan nòdwès preskil la. LaRisi te anekse Krime an 2014.
An menm tan, Hodge endike ke LaRisi poze plis min nan lanmè nan antre pò Ikrèn yo.