Vis-prezidan Etazini Kamala Harris pwomèt yon nouvo epòk tèt-ansanm ak Afrik nan pale, madi, nan Black Star Gate, Pòt Etwal Nwa a, nan kapital Ghana a.
Li ap fè diskou sa a nan 2èm jounen vwayaj li ann Afrik ki ap dire yon semèn.
Pwogram li pou jounen Madi a gen tou yon vizit nan Chato Cape Coast, yon lye kote yo te mare Afriken pou vann yo kòm esklav e anbake yo pou ale nan Amerik yo.
Harris te ensiste lendi ke enterè Etazini nan nasyon afriken yo ale pi lwen pase konpetisyon ak LaChin.
Li te pale konsa ayè lendi nan Kay Jubilee a, ki se syèj prezidans la nan Ghana, lè li te kanpe ansanm ak Prezidan Ghana a, Nana Akufo-Addo.
Harris se 5èm gwo zotobre ameriken ki vizite kontinan an ane sa a, e li kontrekare kritik ki di kòmkwa Etazini wè nasyon afriken yo sèlman pou fè konpetisyon ak LaChin, ki bati kokenn pwojè enfrastrikti e prete nasyon afriken yo dè milya dola nan sa kèk obsèvatè wè kòm yon lit pou enfliyans e pou li ka gen aksè nan resous yo.
