Lame Etazini pibliye yon video jedi ki moutre kote lame ris te entèsepte yon dronn siveyans ameriken, madi, e lakoz li tonbe nan Lanmè Nwa.
Video a moutre yon avyon de gè Sukhoi Su-27 ki t ap lage kabiran pandan li t ap pwoche pa dèyè dronn ameriken MQ-9 la e pase anlè li.
Yon 2èm Sukhoi Su-27 te pwoche menm jan an, e lè li te rive sou dronn nan, te gen yon deranjman nan video a nan moman kote, dapre lame ameriken, avyon konba ris la te fè kolizyon ak dronn nan.
Yon dènye pati nan video a moutre ke imaj la reparèt e ke yon lam nan pwopilsè a pliye.
Video a parèt yon jou apre Sekretè Defans Etazini Lloyd Austin te pale ak tokay ris li sou ensidan an.
« Etazini pwal kontinye vole e opere kèlkeswa kote lalwa entènasyonal pèmèt li fè sa, e se devwa LaRisi pou li opere avyon militè li san danje e yon fason pwofesyonèl, » se sa Austin di jounalis yo apre li te anonse ke li te « fèk sot pale nan telefòn ak Minis Defans ris Sergei Shoigu. »
Se premye fwa 2 lidè defans yo pale nan telefòn depi mwa Oktòb ane pase, dapre otorite yo.