« Se yon balon sivil ki sèvi pou fè rechèch, sitou nan meteo, » e « ki soti an Chin, » se sa yon pòtpawòl ministè afè etranjè chinwa di nan yon kominike. Pòtpawòl la ajoute, « Pati chinwa-a regrèt ke aparèy la te antre san fè espre nan espas aeryen ameriken. »
Jedi, otorite ameriken yo te di ke sa yo sispèk kòm yon balon espyon t ap vwayaje « byen pi wo pase nivo trafik komèsyal aeryen e ke li pa prezante yon menas militè ni fizik pou moun ki atè. »
Etazini detekte balon an sèlman kèk jou anvan yon vwayaj an Chin ke Sekretè Deta Anthony Blinken t ap planifye depi lontan. Li pa klè touswit si balon ke yo dekouvri a ka afekte plan vwayaj li.
Yo te wè aparèy la mèkredi sou eta Montana nan nòdwès peyi a, ki loje youn nan 3 baz avyasyon militè ki opere misil balistik entèkontinantal e fè antretyen yo. Otorite militè yo te konseye pou moun pa tire sou balon an paske yo pa konnen ki sa debri li ka fè sou moun ki atè.