Pandan yon gala, Biden te denonse sal rele "strateji tou nèf" Repibliken yo anplwaye kote y ap voye imigran nan vil demokrat yo ap dirije.
Jedi 15 septanm 2022, 2 otobis chaje ak migran ki soti nan eta Florid debake nan Washington DC toupre kay Vis-Prezidan ameriken an Kamala Harris. Biden kritike desisyon sa a. Li fè konnen olye pou yo travay avèk nou pou jwenn solisyon, Repibliken yo ap fè politik ak kretyen vivan kote yo itilize yo kòm zouti.
Gouvènè Eta Tegzas la, Greg Abbott, transpòte nan otobis plizyè migran ki soti Tegzas nan direksyon vil ki gen majistra demokrat. Gouvènè Arizona a, Doug Duce ak Gouvènè Florid Ron Desantis itilize menm taktik sa.
Mesye DeSantis nan eta Florida te deklare ke eta li pa yon "Vil Refij" - an referans ak eta ki gen vil ki resevwa migran. Nan sans sa li itilize avyon pou debake yon gwoup migran nan zile Martha's Vineyard mèkredi ki sot pase la a .
E Gouvenè repibliken Abbott voye li-menm anviwon 75 migran ale Chikago. Se depi mwa davril la yo komanse voye migran nan New York ak Washington.
Domingo Garcia, prezidan Lig Nasyonal sitwayen latin-ameriken kritike gouvenè Repibliken yo pou aksyon sa-yo ke li di pa kretyen.
Imigrasyon tounen yon gwo zam politik ant pati Demokrat ak Repibliken yo nan moman peyi a ap pare pou eleksyon mi-manda yo.
Anpil nan enfòmasyon sa yo soti nan Associated Press
