Lamezonblanch - Prezidan Joe Biden pral fè anvan lontan premye vwayaj li nan rejyon Mwayen Oryan an kote li gen pou l vizite Izrayèl, Si-Jòdani ak Arabi Sawoudit, dapre sa Lamezonblancnh anonse madi. Analis yo fè konnen se yon vwayaj ki kapab fe avanse pwosesis delika nòmalizasyon relasyon ant Izrayèl avek peyi vwazen l yo nan yon rejyon kote sitiyasyon an konplike e ki gen yon gwo enpòtans estratejik pou Washington.
Deplasman sa a, k ap dire 4 jou, pral kòmanse ann Izrayèl kote Biden gen pou l rankontre ak lidè Eta ebre a. Li pral fè chita-tande tou nan Si-Jòdani ak otorite palestinyen yo, pou li ofri yo apui li pou yon solisyon ki prevwa ekzistans 2 eta ant pati konsène yo.
Lè lidè ameriken an va kite Izrayèl, li prale nan Jaddah, yon vil nan Arabi Sawoudit ki gen repitasyon kòm yon vil kote ou jwenn 2 nan lye ki pi sen pou mond islamik la, Lamèk ak Medina. Izrayèl ak Arabi Sawoudit pa gen relasyon diplomatik e se va premye vòl avyon dirèk yon Prezidan ameriken pral pran ant Izrayèl ak yon Eta arab ki pa rekonèt peyi a depi ansyen Prezidan Donald Trump te fè yon vwayaj istotik ant Riyad ak Tel Aviv an 2017.
