Accessibility links

Breaking News

Repiblik Dominikèn Remèt yon Ex-Polisye PNH Bay Ayiti ki Enplike nan Asasina Jovenel Moise la


Foto Achiv: Prezidan Ayisyen Jovenel Moise pale pandan yon entevyou ak Associated Press lakay li, nan Pelrin, Ayiti, 7 Fevriye 2020.

Otorite Dominiken yo remèt bay Ayiti yon ansyen polisye ki lye ak asasina Prezidan Jovenel Moise. Misye se dènye pami yon gwoup sispèk ke la jistis mete anba kòd.

Otorite Dominiken yo idantifye misye kom Tanis Philome. Yo te arete'l Repiblik Dominikèn kek jou anvan yo te remèt li bay lapolis Ayisyen nan vil Dajabon ki sitye sou frontyè Ayiti pataje ak Dominikani, dapre sa yon ofisye militè di Associated Press.

Responsab la ki pale sou kondisyon yo pa site non ni, paske li pat gen otorizasyon pou'l pale ak lapres, di otorite Dominiken yo tap envestige Philome anvan yo te remet li bay Ayiti. Responsab la pa di kile yo arete Philome, selman ke li se yon sispek nan asasina prezidan an.

Nap raple ke Prezidan Jovenel Moise te mouri asasinen nan rezidans prive li bone maten 7 Jiye. Gen plis pase 40 moun la jistis arete an koneksyon ak krim nan - pami yo plizye polisye Ayisyen ak yon ansyen senate. Gen 18 ex-sòlda Kolonbyen ki femen nan prizon tou. Majorite nan yo di yo te desevwa yo le yo te ofri yo djòb pou travay kòm gad sekirite.

Gen 2 lòt sispek nan femen nan prizon Ozetazini apre la jistis Ameriken te ekstrade yo - an palan de Rodolphe Jaar, yon ansyen enfòman gouvenman Ameriken an ke yo te arete nan Repiblik Dominiken nan mwad Janvye a, epi Mario Antonio Palacios Palacios, yon ex-sòlda Kolonbyen ke Jamayik te arete nan mwad Oktob 2021.

Pwosesis jidisye pou jwenn koupab la trennen ann Ayiti. La jistis paka menm jwenn yon jij pou jere dosye a. Gen 2 jij ki bay demisyon yo, youn pou rezon pesonel e lòt la yo te akize de kowipsyon, yon akizasyon li demanti.

XS
SM
MD
LG