Accessibility links

Breaking News

Mario Palacios Pral Plede Non Koupab, Dapre Avoka li


Mario Antonio Palacios, 43, a Colombian national who was arrested and charged in the United States in connection with the plot to assassinate Haitian President Jovenel Moise, appears in court in Miami, Florida, U.S., January 4, 2022 in this courtroom sket

Yon jij federal akòde demann akize a pou ranvwaye odyans li pou 30 jou, pou pèmet avoka li rankontre ave'l fas a fas pou prepare defans li

Ansyen sòlda kolonbyen Mario Antonio Palacios Palacios, youn nan prensipal sispèk nan asasina Prezidan Ayisyen Jovenel Moise, te konparèt devan yon jij federal nan eta FLorid Vandredi.

Pandan odyans tou kout la nan Miami, avoka ki reprezante Palacios la, Alfredo Izaguirre eksplike jij Jacqueline Becerra ke akoz sitou pandemi kowonaviris la li pat ka rankontre fas a fas, kliyan li kidonk li pat gen tan ki nesesè pou l prepare pou odyans la.

Jij la te reponn "map bawou 30 jou" e li fikse pwochen paret li devan tribinal la pou 4 Mas.

Avoka gouvènman Ameriken an te dakò ak deman sa a.

Palacios, ki gen 43 zan ap fè fas ak akizasyon dèske li te patisipe nan asasina oubyen kidnaping yon lidè etranje andeyò peyi Etazini e ke li te founi asistans materyel ki te rezilte nan lanmò, sachan ke asistans sa a tapral sèvi pou komèt swa yon asasina oubyen yon kidnaping.

Desizyon jij la pou ranvwaye odyans la vle di, Palacios ap gen plis tan pou'l prezante deklarasyon sou kilpabilite li oubyen inosans li. Sa va bay avoka gouvènman an tou plis tan pou montre prèv pou apiye akizasyon yo. Li posib tou ke sa va pèmèt 2 avoka yo antann yo sou kijan Palacios pral plede, malgre ke avoka li, Izaguirre di li pa anvizaje sa pou kounyea.

Kolonbyen an fe demann pa ekri Mekredi pou ranvwaye odyans la pou 30 jou, men jij la potko pran yon desizyon. Anpil moun tap tann odyans jodia pou tande ofisyelman akizasyon Lajistis Ameriken lanse kont Palacios ak kijan li pral plede men okenn nan bagay sa yo pat fèt.

Pandan yon konferans pou laprès enpwovize apre odyans la, Izaguirre deklare ke Palacios pral pwoklame inosans li 4 Mas kap vini an.

"Se yon ka delika," avoka Palacios la esplike pa rapò ak poukisa li pa kwè yo pral eseye jwenn yon antant ak avoka gouvènman an. "Li kwè li vle plede inosan e goumen pou genyen ka a." Izaguirre di li kwè ka sila a takapab pran yon ane ou plis.

Palacios se youn pami 2 moun Etazini akize an koneksyon ak asasina Prezidan Moise.

Rodolphe Jaar, kap fe fas ak menm akizasyon yo. Li va gen pou'l paret devan tribinal 25 Fevriye.

Parèt Palacios fè devan tribinal la Vandredi, se dezyèm parèt li nan sid Florid. Li te rive Ozetazini nan mwad Janvye a. Depatman Jistis Etazini te asire transfè Kolonbyen an ak Jaar Ozetazini pou fè fas ak akizasyon sa yo.

Tou 2 mesye yo femen nan prizon federal ki sitye anba lavil Miami an.

Palacios te gen yon chemiz ak pantalon bej sou li, e li te menote pandan paret li devan tribinal la. Li te kanpe devan jij la ak avoka li bo kote li. Misye pat pale anpil pandan odyans la, repons li te limite a wi (si ann espayol) le jij la te mande'l si'l te konprann ke li mande pou ranvwaye odyans la, epi non "non senora" le jij la mande'l si'l gen objeksyon.

Dapre la jistis Ameriken, kolonbyen an te pale volonteman ak yo nan mwad Oktob la nan la Jamayik kote li te femen nan prizon pou antre ilegal nan peyi a. Li di yo ke li te gen yon kontra pou'l vwayaje Ayiti, sekirize epi patisipe nan yon operasyon pou arete prezidan an.

Otorite Ameriken yo di ke li esplike ke plan orijinal la sete pou konspirate yo kaptire Moise nan ayewopo nan mwad Jyen epi mennen li ale. Dapre akizasyon yo, Palacios di ke gen lot konspirate, ke li pa idantifye ki te di'l ke vre plan an sete asasina Moise yon jou anvan evenman an.

Moise, te gen 53 zan le moun ak zan te debake lakay li nan granm maten 7 Jiye nan yon banlye Potoprens epi tire e touye li.

Jamayik arete Palacios nan mwad Oktob la. Nan moman sa a, Ayiti te gen yon mande d'are kont li, ansanm ak yon alet wouj Enterpol an koneksyon ak asasina a, vol arme ak deli.

Jamayik konfime an Janvye depotasyon Palacios nan Kolonbi, apre li di li pat resevwa ase dokimantasyon nan men Ayiti pou transfere li nan peyi sa a. Jamayi pa gen trete ekstradisyon ak Ayiti.

Nan dat 3 Janvye, nan moman Palacios te konprann li tapral Colonbi, yo te arete li pito pandan yon eskal avyon li te fe nan Panama, epi transfere'l Ozetazini.

Ayiti arete yon total 40 sispek an koneksyon ak asasina Moise la. Pami yo, gen 20 ex-solda Kolonbyen.

Palacios te manm fos zame Kolonbi pandan 20 an.

XS
SM
MD
LG