Accessibility links

Reyaksyon Aprè Prezidan Obama deklare Li Apiye Maryaj ant Omoseksyèl


Prezidan Barack Obama nan entèvyou li bay chèn televizyon ABC sou maryaj ant 2 moun menm sèks - 9 me 2012.
Apui prezidan ameriken an, Barack Obama, pote ouvètman bay maryaj ant 2 omoseksyèl Ozetazuni (swa 2 gason, swa 2 fi) pwovoke reyaksyon depaman nan lemond. Sou kontinan ewopeyen an, pa egzanp, minis afè etranjè alman an, Guido Westerwelle, ki se yon omoseksyèl popilè, bat bravo pou desizyon Misye Obama pran semèn sa a pou l di li apiye lide pou lalwa bay 2 moun ki gen menm sèks dwa pou yo marye e jwi menm privilèj ak yon koup kote 2 moun yo genyen sèks diferan. Misye Westerwelle di – nap site :

«Mwen panse deklarasyon Prezidan Obama fè pou l apiye maryaj ant moun menm sèks, se yon aksyon gason vanyan; mwen byen akeyi pozisyon prezidan an nan non pèsonèl menm e nan non gouvènman alman an. »

Sepandan, achevèk vil Diblen an nan peyi Irland, Diamuid Martin, ki tap vizite Vatikan an jedi-a, fè konnen presèp legliz katolik sou pwen sa a se pensip ki klè kou dlo kokoye; asavwa, maryaj se yon bagay ki dwe fèt ant yon gason ak yon fi. Achevèk la deklare –nap site tou :

“Sa pa vle di nou pa dwe pwoteje dwa moun genyen pou yo mennen vi yo vle mennen. Sepandan, dapre legliz, enstitisyon maryaj la, se pa yon konstriksyon sosyal moun ka chanje lè yo vle; se yon bagay ki fè pati ansèyman fondamantal Legliz Katolik. »

Anvan sa, Prezidan Obama pat vle apiye lide pou 2 moun ki gen menm sèks marye; paske, daprè sa l di, li potko genyen yon pozisyon fiks sou kesyon an. Finalman li apiye tip maryaj sa yo aprè li te pran an konsiderasyon sitiyasyon moun li byen konnen --tankou kèk anplwaye La Mezon Blanch ki gen menm sèks e kap viv ansanm, san yo pa kapab benefisye dwa lalwa bay koup kote 2 moun yo genyen menm sèks.
XS
SM
MD
LG