Accessibility links

Breaking News

Prezidan Trump Reponn Kesyon Lavwadlamerik sou Rapò Etazini avèk Lòt Grann Puisans


Prezidan Donald Trump nan yon entèvyou avèk jounalis Greta Van Susteren, kontribitè Lavwadlamerik.

Jounalis Greta Van Susteren, kontribitè Lavwadlamerik, fè yon entèvyou avèk Prezidan Donald Trump nan koulis Somè G-20 an ki kòmanse vandredi 30 novanm 2018 la nan vil Buenozè, kapital Ajantin, e k ap pran fen samdi premye desanm nan. Men yon ekstrè nan entèvyou sa a.

=====================================================

KESYON: Somè G-20 an se yon okazyon pou patisipan yo fè deba sou ekonomi mondyal la. Si ou pran yon rekil epi ou jete yon koudèy sou lemond, kisa ou wè kòm pi gwo menas la, yon menas reyalis, pou ekonomi mondyal la nan yon avni ki pa twò lwen?

REPONS PREZIDAN TRUMP: “Ebyen, genyen anpil menas; men reyalite a sè ke gen anpil peyi ki eksplwate Lèzetazini. Mwen pa p mete okenn sekrè deyò si mwen di Lachin pase anpil ane ap jwe yon jwèt koken avèk nou; l ap jwe jwèt sa a depi 25 kan e se yo ki te toujou genyen…”

KESYON: … Se sa ou abitye di mwen; ou te konn di m sa depi anvan ou te kandida a la prezidan…”

REPONS PREZIDAN TRUMP: Gen lontan depi m ap di sa. Lè m te fèk kòmanse nan pwofesyon antreprenè imobilye a, se sa m te konn di ou; m te konn di anpil lòt moun sa tou. Sa vle di se pa jodi a m ap pale de sa. Mwen te konn di sa de Japon tou. Jounen jodi a Japon fè yon ti kalme l; men Japon rete trè agresif, trè aktif tou. An fèt se preske tout moun k ap fè nou travay sa a.

KESYON: Pandan w ap di Lachin se youn nan peyi sa yo (peyi k ap pran pwofi ilegal sou Lèzetazini), Lachin ap ogmante enfliyans li atravè lemond. Pa egzanp, chinwa yo te deja prezan an Afrik di Nò; y ap konstwi yon gwo kokenn chenn pò nan Pakistan; yo genyen anpil kontra, gwo kontra envestisman avèk Panama e ak lòt peyi nan Amerik Latin nan… kòmkwa y ap pwoche trè-trè pre Lèzetazini sou plan jewografik la. Eske ou dakò ak objektif estratejik Lachin yo? Eske ou pa yon ti jan gen kè-sote?

Prezidan Donald Trump an fas Greta Van Susteren ki bay do (Foto: vandredi 30 novanm 2018).
Prezidan Donald Trump an fas Greta Van Susteren ki bay do (Foto: vandredi 30 novanm 2018).

REPONS PREZIDAN TRUMP: “Ebyen, mwen panse yo pral gen mwens lajan pase sa yo posede jounen jodi a, paske n ap pratike yon bon politik; e, si w byen gade w ap wè n ap antre 250 milya dola jodi a nan echanj komèsyal nou yo avèk yon tarif 25%. Sa vle di se dè e dè milya dola n ap antre e gen posiblite pou m double lajan sa a; m ka menm redouble l ankò. E, m ap di w yon bagay: yo pa p janm ka rekòmanse fè sa yo te fè avèk prezidan pase yo…. Gade jan Lachin ap konpòte l jodi a! Mwen pa renmen aji jan m ap aji a; men rezilta a, sè ke zòt pa ka fè sou nou gwo kokenn pwofi yo te konn fè anvan yo. Alòs, mwen panse n ap fè yon bon travay… Depi m te ranpòte eleksyon an, nou antre 11 trilyon 700 milya dola ki vin ranfòse kwasans ekonomik nou; tandiske se bese kwasans ekonomik Lachin ap bese. Rezilta a sa bay, sè ke nou ranfòse pozisyon nou kòm yon ekonomi ki pi gwo lontan pase Lachin --yon bagay anpil moun pa konnen. Men reyalite a sè ke ekonomi nou an pi gwo lontan pase ekonomi chinwaz la; nou reprezante yon fòs ekonomik ki pi puisan lontan pase Lachin.

KESYON: Men, kòm ou konnen, Prezidan, sou plan sekirite nasyonal la, Lachin genyen envestisman nan Amerik Latin nan e tout kote nan lemond. Sanble yo ap ogmante enfliyans yo atravè lemond

REPONS PREZIDAN TRUMP: Mwen konnen; men peyi sa yo genyen yon pwoblèm dèt e yo dwe peye dèt sa a. Se yon voum lajan Lachin ap depanse nan peyi sa yo. Eske m kontan sitiyasyon sa a? Se san di pètèt, non; men sa m konnen tou, sè ke yo depanse anpil-anpil kòb pou yo fè sa y ap fè a. Epi dayè, a la fen dè fen se echwe yo pral echwe nan anpil nan peyi sa yo.

KESYON: Ou te gen pou al rankontre avèk Putin -an tou ka ou t ap anvizaje posiblite pou ou rankontre avèk Putin. Men finalman ou anile plan sa a. Si ou ta rankontre avèk li, kisa ki t ap sou ajanda a?

REPONS PREZIDAN TRUMP: Franchman, lè n konsidere sa k rive avèk Ikrèn, avèk bato yo, avèk maren yo, m pa panse se yon bon moman pou yon rankont fèt. Men m gen pou m rankontre avèk li. Nou genyen yon bon jan relasyon avèk Larisi; mwen panse nou pral kontinye genyen yon ban relasyon avèk Larisi, avèk Lachin, ak tout moun. Se yon kesyon ki trè zenpòtan. Alòs, mwen va rankontre avèk li nan moman ki apwopriye a.

XS
SM
MD
LG