Accessibility links

Breaking News

Risi 2018 /1e Match Ka de Final: Lafrans: 2 - Irigwe: 0


Jwè fransè yo ap selebre viktwa yo sou ekip irigweyen an nan stad Nizhny Novgorod, nan Larisi, vandredi 6 jiyè 2018 la. (Foto: AP/David Vincent).

Nan kad Koup Dimond Foubòl 2018 la nan Larisi, premye match ka de final la mete fas a fas ekip nasyonal Lafrans la ak 11 nasyonal Irigwe a. Premye mitan an fini sou skò 1-0 an favè Lafrans. Bitè a se Raphael Varane. Men Antoine Griezmann ta pral make yon 2èm gòl nan 16èm minit 2èm mitan an. Se sou skò sa a rankont la fini

PERIPESI RANKONT LA:

2 seleksyon nasyonal yo remèt yon bèl foutbòl pandan premye mitan an. Plis ke 30 minit te pase e balon an pot ko vizite okenn filè: 2 ekip yo a te toujou a egalite 0-0. Pa egzanp, nan 33èm minit 1e mitan an (a 10 zè 33) piblik lokal la ak piblik mondyal la te toujou ap asiste dewoulman yon match trè zenteresan kote balon an te woule seryezmna nan tou lè 2 kan yo. Chak ekip te parèt menasan pou lòt la e jwè yo t ap fè kè fanatik yo kontan avèk yon foutbòl wo nivo.

"Le choc de deux grands joueurs": Kylan Mbappe, an blan a goch, Frans; - ak Luis Suarez an ble e nwa, Irigwe. (Foto: REUTERS/Darren Staples -Stad Nizhny Novgorod, nan Larisi, vandrei 6 jiyè 2018).
"Le choc de deux grands joueurs": Kylan Mbappe, an blan a goch, Frans; - ak Luis Suarez an ble e nwa, Irigwe. (Foto: REUTERS/Darren Staples -Stad Nizhny Novgorod, nan Larisi, vandrei 6 jiyè 2018).

Men -verite se verite- depi 30èm minit la Lafrans te montre li trèzagresif avèk anpil "tires au but". Se konsa, nan 40èm minit la, pandan jwè yo te mase devan filè irigweyen an, Raphael Varane te resevwa yon pas anlè, yon pas kwaze de dwat a goch pandan li te sou yon ditans apèn 10 mèt konsa ak filè advès la, epi ak yon tèt li ta pral ouvri skò a. Gadyen an te vole kou on laj dèyè boul la; men sete yon boulèt enparab: skò 1-0 pou Lafrans. 5 minit aprè sa sete kout souflèt abit la epi 2 ekip yo te pran wout vestyè a pou poz la.

Raphael Verane pandan li t ap make premye gòl la pou Lafrans.
Raphael Verane pandan li t ap make premye gòl la pou Lafrans.

Nan 2èm mitan an, Lafrans ta pral montre li te plis sou pik li ke Irigwe nan faz kote Chanpyona Mondyal la rive a. Alòs ke te gen bèl atak sou tou lè 2 gadyen yo, poulen Didier Deschamps yo te domine pandan 50 minit 2èm peryòd la te di dire a (45min. tan reglemantè, plis 5 min. arè de je). Dominasyon mesye "Les Bleus" yo ta pral bay rezilta pozitif, paske li te parèt sou "tableau d'affichage" la aprè Antoine Giezmann te make yon 2èm bi. E se sou skò sa a (2-0) rankont la fini.

Vè fen match la e aprè rankont la moun te ka wè kèk jwè irigweyen (sitou kaptenn nan, Diego Godin) ak plizyè fanatik ki t ap kriye. N ap raple tou 2 ekip yo ranpòte chanpyona mondyal la deja: Irigwe 2 fwa (1930 ak 1950) epi Lafrans yon fwa (1998).

=============================================

2èm match 1/4 de final ki sou pwogram jounen vandredii 6 jiyè 2018 la se Brezil kont Bèljik.

XS
SM
MD
LG