Accessibility links

Breaking News

Bon Dewoulman Rankont Preliminè sou Somè Amerikano-Nò-Koreyen an


Lidè Kore di Nò a, Kim Jong Un, pandan li t ap vizite Otèl Marina Bay Sands nan Sengapou nan jounen lendi 11 jen 2018 la.

Prezidan ameriken an, Donald Trump, pral pati kite Sengapou nan sware jounen madi 12 jen 2018 la aprè dewoulman somè istorik k ap mete li fas-a-fas ak lidè Kore di Nò a, Kim Jong Un. La Mezon Blanch, ki anonse nouvèl la lendi, ajoute diskisyon ki fèt ant otorite 2 peyi yo ap kontinye e yo mache pi vit ke sa yo te prevwa.

Daprè yon deklarasyon ki sòti nan palè nasyonal Lèzetazini an, PrezidanTrump pral fè yon tèt-a-tèt a 2 avèk Misye Kim nan matine jounen madi a, kote se entèprèt 2 lidè yo sèlman k ap prezan; ansuit pral genyen yon dejene-travay anvan yon rankont bilateral elaji avèk patisipasyon Sekretè Deta Mike Pompeo, Chèf Pèsonèl La Mezon Blanch la, John Kelly, avèk Konseye pou Sekirite Nasyonal la, John Bolton.

Aprè rankont la, Prezidan Trump pral bay yon konferans-pou-laprès anvan li pran avyon pou l retounen Ozetazini byen ta nan madi, lè Sengapou. Enfòmasyon ki te parèt anvan anons sa a te prevwa lidè ameriken an te gen pou kite Sengapou mèkredi pito.

Prezidan Donald Trump ki t ap rankontre avèk Premye Minis Sengapou a, Lee Hsien Loong, anvan dewoulman somè amerikano-nò-koreyen an. (Foto:AP/Evan Vucci, Sengapou, lendi 11 jen 2018).
Prezidan Donald Trump ki t ap rankontre avèk Premye Minis Sengapou a, Lee Hsien Loong, anvan dewoulman somè amerikano-nò-koreyen an. (Foto:AP/Evan Vucci, Sengapou, lendi 11 jen 2018).

Nan lavèy somè amerikano-nò-koreyen an, ofisyèl ameriken yo te ensiste pou yo di tout akò ki ta sòti nan diskisyon yo dwe gen ladan n angajman Kore di Nò pou li mete fen nan pwogram fabrikasyon zam nikleyè li a epi sispann lanse menas pou di kòmkwa li kapab itilize misil balistik. Nan jounen lendi 11 jen an, Sekretè Deta Mike Pompeo te di laprès nan Sengapou pa pral genyen nan somè sa a okenn akò tèt-chat tankou akò ansyen gouvènman ameriken yo te siyen avèk Kore di Nò.

XS
SM
MD
LG