Accessibility links

Breaking News

Priz-Dotaj Aparan nan Pati Sid Lafrans. Bilan: 2 Moun Pou Pi Piti Pèdi lavi Yo


Jounal La Depeche Du Midi pran foto sa a nan vil Trebes, sid Lafrans, kote lapolis ap mennen ankèt sou sa k sanble ak yon priz-dotaj, vandredi 23 mas 2018 la. (Foto: AP/La Depeche Du Midi).

An Frans, nan kòmansman jounen vandredi 23 mas 2018 la, ministè enteryè a fè konnen 2 moun pou pi piti mouri lè yon nonm ame, ki swadizan di lap travay pou Gwoup Eta Islamik la, te ouvè koutzam nan yon sipè-mache nan kad sa ki sanble ak yon priz dotaj nan vil Trebes, nan pati sidwès peyi a. Daprè polis nasyonal fransèz la, otorite yo prese ansèkle sispèk la nan sipè-mache a e yo repran kèk otaj.

Premye Minis fransè a, Edouard Philippe, deklare anketè yo ap trete sitiyasyon an kòm yon zak teworis. Pandan Misye Philippe tap pale ak laprès, li di:

<< Tout enfòmasyon nou genyen nan moman nap pale la a fè nou panse aksyon sa a se yon atak teworis. >>

Machin polis fransèz ki prezan sou sèn atak la nan pati sid peyi a.
Machin polis fransèz ki prezan sou sèn atak la nan pati sid peyi a.

Biwo kòmisè gouvènman Pari a fè konnen otorite anti-teworis yo pran kontwòl ankèt la, men li pa eksplike poukisa. Daprè Premye Minis Philippe, yon polisye twouve li nan yon sitiyasyon stab apre li te resevwa bal nan vil Carcassonne ki tou prè Trebes, anvan priz dotaj aparan an. Yves Lefebvre, yon manm wo-plase nan Sendika Nasyonal Polis la, di yon poliyes blese lè atakan an te ouvè kout-zam sou yon gwoup ajan de lòd ki tap fè jogging nan Carcassonne.

Lafrans twouve li nan yon eta dalèt byen elve depi ane 2015 apre Gwoup Eta Islamik la te lanse yon seri de atak nan peyi a -atak ki touye plis pase 200 moun.

XS
SM
MD
LG