Accessibility links

Breaking News

Ayiti-Byenfezans: Prezidan Moise Reyaji ak Kòlè sou Dosye OXFAM nan


Prezidan ayisyen an Jovenel Moise (FOTO: REUTERS/Andres Martinez Caceres)

Ann Ayiti, Prezidan Jovenel Moise kondane òganizasyon byenfesans britanik OXFAM apre nouvèl te parèt pou fè konnen manm pèsonèl oganizasyon sa a te itilize pwostitye pandan li t ap ofri asistans li apre tranblemanntè janvye 2010 la.

Jounal ameriken Times, ki te ekri yon atik sou dosye a semèn pase a, fè konnen yon ankèt OXFAM te mennen an 2011 te deja revele responsab wo-plase òganizasyon an ann Ayiti (pami yo te genyen direktè ajans sekou a nan peyi a) te peye pwostitye ayisyèn pou sèvis seksyèl. Kèk sous menm fè konnen yo te anboche jennfi ki minè pou kalte aktivite sa yo. Yon jounal nan La Grann Bretay akize OXFAM deske li te pran dispozisyon pou l kase fèy, kouvri sa.

Prezidan Jovenel Moise pibliye sou kont twitter li yon nòt kote li denonse ak tout fòs move zak sa ki, dapre li, se "yon vyolason grav diyite kretyen-vivan." Dapre yon sous gouvènmantal ann Ayiti, otorite yo pral ouvè yon ankèt sou aktivite tout òganizasyon etranje k ap pote asistans ann Ayiti.

Bò kote OXFAM, responsab yo rekonèt ke kowoperan yo te komèt move zak yo vrèman e anpil manm pèsonèl òganizasyon an jwenn revokasyon yo oubyen yo bay demisyon yo apre dirijan gwoup la te mennen yon ankèt sou dosye a; men yo demanti pawòl kòmkwa te gen kase-fèy, kouvri sa.

Logo OXFAM devan yon libreri òganizasyon an genyen nan Glasgow, Peyi Lekòs. Gouvènman britanik la anonse, nan jounen 9 fevriye 2018 la, li pral pase an revi finansman li bay OXFAM Oxfam aprè nouvèl fin parèt pou di òganizasyon byenfesans la te itilize sèvis fanm movez vi ann Ayiti. (Foto: 10 fevriye 2018).
Logo OXFAM devan yon libreri òganizasyon an genyen nan Glasgow, Peyi Lekòs. Gouvènman britanik la anonse, nan jounen 9 fevriye 2018 la, li pral pase an revi finansman li bay OXFAM Oxfam aprè nouvèl fin parèt pou di òganizasyon byenfesans la te itilize sèvis fanm movez vi ann Ayiti. (Foto: 10 fevriye 2018).

Daprè dènye nouvèl yo, vis prezidan OXFAM nan, Penny Lawrence, bay demisyon li akoz repwòch responsab yo resevwa pou jan yo jere dosye a; epi gouvènman britanik la menase pou l koupe tout finansman l ap bay òganizasyon byenfezans la.

XS
SM
MD
LG