Premye Minis britanik la, Theresa May, pare pou l mande yon renouvèlman sa li rele “relasyon espesyal ki egziste ant La Grand Bretay avèk Lèzetazini", nan moman peyi li ap pare pou l kite Inyon Ewòp la e pandan prezidan ameriken an, Donald Trump, fèk komanse manda 4 tran li a nan La Mezon Blanch.
Chèf gouvènman britanik la vizite vil Filadelfi, nan Eta Pennsilvani, nan jounen jedi 26 janvye 2017 la anvan li rankontre ak Misye Trump nan La Mezon Blanch vandredi. Lap tounen premye lidè etranje Prezidan ameriken ap resevwa depi li te prete sèman vandredi 20 janvye pase a.
Pandan Madam May nan Filadelfi a, li pran lapawòl nan yon retrèt lidè Repibliken yo nan kongrè a --retrèt kote, daprè yon diskou Madam May te prepare davans, li mete aksan sou relasyon istorik ki egziste ant Washington avèk Lond.
Prezidan Trump ak vis-prezidan Mike Pence, yo menm tou, asiste retrèt la nan jounen jedi a. Misye Trump pran lapawòl pou l anonse chanjman li vle pote nan politik nasyonal ak entènasyonal Lèzetazini, avèk yon aksan espesyal sou dekrè li deja pran pou l kòmanse reyalize pwomès li te fè pandan kanpay elektoral la e sou travay kap tann kèk nan manm nouvo kabinè li a.