Accessibility links

Ayiti-Politik: Palman an Poko Pran Oken Desizyon Swa pou Ranplase Jocelerme Privert, Swa pou Kite Li sou Pouvwa a

  • Ekip Sèvis Kreyòl VOA

Haiti

Youn nan pòtpawòl pati politik PHTK (Pati Ayisyen Tèt Kale), Renald Liberis, kwè li enpòtan pou Prezidan pwovizwa a, Jocelerme Privert, kite pouvwa a nan respè Akò 5 Fevriye 2016 la. Daprè misye Liberis, chèf deta a pa gen otorite pou l pran okenn desizyon ki angaje peyi a; pa konsekan li pa ka rete nan tèt pouvwa egzekitif la.

Nan menm sans la, youn nan dirijan “Amical des Juristes”, mèt René Julien, swete Prezidan Privert va kite pouvwa, jan Akò 5 fevriye a prevwa l la. Misye Julien pwopoze pou Premye Minis Enex Jean Charles asire enterima a e kontinye ak pwosesis elektoral ki te kòmanse an 2015 la.

Sou menm dosye leadership la ann Ayiti: Doktè Louis Gerald Gilles, manm direktwa Pati fanmi lavalas, fè konnen PrezidanJocelerme Privert gen ase otorite pou l kontinye pwosesis elektoral la. Nan sans sa a, Doktè Gilles lanse apèl bay palmantè yo ak lòt sektè konsène yo pou l mande yo travay ansanm pou yo jwenn yon solisyon pou kriz la.

Anfen, reprezantan peyi manm Òganizasyon Eta Ameriken yo retounen lakay yo apre yo fin patisipe nan 46èm asanble jeneral òganizasyon rejyonal la ki dewoule ane sa a nan Santo Domingo, Repiblik Dominikèn. Anvwaye espesyal Sèvis Kreyòl la, Jacquelin Belizaire, di nou pandan 2 jou delege yo fè deba sou, antwòt, fason pou yo travay ansanm pou yo rezoud pwoblèm politik, sosyal ak ekonomik rejyon an ap konfwonte.

XS
SM
MD
LG