Accessibility links

Konferans Entènasyonal sou Chanjman Klimatik yo – Yon Mesaj Prezidan Obama


Yo te pran foto sa a nan dat 7 jen 2015. Li montre lafimen ki tap sòti nan yon dife ki te pran nan Bogus Creek, youn nan ensandi ki pase lontan ap fè ravaj nan yon rezèv "espace vert" ki rele Yukon Delta National Wildlife Refuge, nan pati sidwès Eta Alaska. (Foto: Matt Snyder/Alaska Division of Forestry via AP).

Prezidan ameriken an, Barack Obama, ap kite vil Washington lendi 31 out 2015 la pou l ale nan Eta Alaska, nan pati nòdès peyi a, kote l pral rankontre ak rezidan yo epi fè yon diskou nan yon konferans kote otorite, espesyalis ak sitwayen Lèzetazini ak kèk lot peyi pral reyini pou yo diskite sou konsekans chanjman klimatik yo sou rejyon Atik la.

Non rankont entènasyonal sa a se "Konferans sou Glacier yo." Daprè La Mezon Blanch, objektif la se ranfòse priz de konsyans lemond sou fason ogmantasyon tanperati yo nan rejyon Atik la gen konsekans sou rès planèt la e kisa lòm ka fè pou korije sitiyasyon an.

Pwoblèm chanjman klimatik yo te nan sant mesaj Prezidan Obama mete chak weekend devan pèp ameriken an. Nan mesaj sa a, li fè konnen moun kap viv nan Eta Alaska yo ap fè move eksperyans ak dife sovaj, deteryorasyon glacier yo, kèk nan ewozyon ki pi tèrib nan lemond e ki pa sipann redui limit kotyè rejyon an akoz nivo lanmè a kap monte, sa ki pwovoke inondasyon byen souvan akoz glacier yo kap fonn.

Nan sesyon ki pral dewoule nan konferans sa a, pami tèm panelis yo pral abòde genyen: kowoperasyon nan domèn syantifik la, enèji renouvlab, ranfòsman repons dijans yo avèk, antwòt, dispozisyon serye pou anpeche yon lapèch egzajere nan rejyon atik la.

XS
SM
MD
LG