Accessibility links

Iran/Pwogram Nikleyè : Sekretè Deta Kerry Devan Komite Relasyon Etranjè Sena a

  • Ekip Sèvis Kreyòl VOA

Sekretè Deta John Kerry (adwat) ak Minis Enèji a, Ernest Moniz (agoch) pandan yo tap rive nan Kongrè a mèkredi 22 jiyè 2015 la pou yon rankont ak tout pòt fèmen ak manm Chanm Bas la sou akò 2 puisans jwenn ak Iran sou pwogram nikleyè peyi sa a. (Foto: (AP/Andrew Harnik) .

Ozetazini, otorite wo-plase nan administrasyon Obama a ap ranfòse efò yap deplwaye pou yo eseye fè manm Kongrè a aksepte akò 6 puisans mondyal ak Teyeran te jwenn sa pa gen lontan sou pwogram nikleyè iranyen an. Nan tèt efò sa yo nou jwenn chèf diplomasi amerikèn nan, John Kerry, ki te patisipe nan negosyasyon yo. Misye Kerry di :

"Se yon jou nou tap tann ak anpil enpasyans, paske nou fèt pou n kòmanse pale de sa ki vrèman esansyèl nan kesyon an; nou fèt pou n kite politik sou kote epi abòde fè reyèl yo."

Sekretè Deta Kerry pale konsa mèkredi 22 jiyè 2015 la anvan li prezante devan kongrè a nan jounen jedi a pou l reponn kesyon Komite Afè Etranjè Sena a sou akò Lèzetazini ak 5 lòt puisans mondyal te jwenn semèn pase a avèk Iran nan vil Vyèn, nan peyi Lotrich.

Antant nikleyè sa a genyen anpil sektè ki kritike li. Pa egzanp, nan jounen mèkredi a yon gwoup manifestan te defile nan vil New York pou yo denonse dokiman an ak espwa manm Kongrè a va tande vwa yo. Raben Abraham Cooper, yon lidè relijye jwif-ameriken e manm Sant Simon Wisenthal, te youn nan chèf manifestasyon an. Misye Cooper deklare:

"Si palmantè yo ka konvenk nou akò a gen ladan n yon bagay kèlkonk ki merite konsève, nou pare pou n tande yo. Sinon nou espere yap gen kouray --ni kouray pèsonèl, ni kouray politik-- pou yo fè sa ki korèk la epi vote kont akò a.”

Kongrè ameriken an gen jous mitan mwa septanm pwochen pou l apwouve oubyen rejte akò a. Dokiman an prevwa leve sanksyon kap peze sou do Iran yo kòm kondisyon pou peyi sa a degrade pwogram nikleyè l la.

XS
SM
MD
LG