Accessibility links

Breaking News

Prezidan Michel Martelly Lanse Kanpay Agrikòl Prentan an


Prezidan ayisyen an, Michel Martelly.
Prezidan ayisyen an, Michel Martelly.

Prezidan ayisyen an, Michel Martelly, lanse Kanpay Agrikòl Prentan an (CAP) lendi 23 fevriye 2015 la nan Komin Kenskof, tou pre kapital la, Pòtoprens.

Objektif pwogram nan se devlope sektè agrikol la sou tout teritwa a, e sitou ankouraje plantè yo nan Kenskoff pou yo pwodui fwi ak legim nan komin nan. Prezidan Martelly bay fèmye yo konsèy pou yo òganize yo an kowoperativ pou yo kapab gen aksè ak finansman. Premye Minis Evans Paul ki te pran lapawòl nan okazyon an, di Komin Kenskoff kapab pwodui ase fwi ak legim pou alimante mache lokal la.

Nouvèl Ayiti -Madi 24 fevriye 2015
please wait

No media source currently available

0:00 0:11:35 0:00
Direct link

Premye Minis Paul enstale nouvo Minis Agrikilti a, Fresner Dorcin, nan menm jounen lendi a. Seremoni enstalasyon sa a dewoule apre etidyan Fakilte Agronomi te pase tout yon mwa ap pwoteste kont 3 nominasyon gouvènman an te fè --pami 3 kandida sa yo te genyen ansyen minis agrikilti Jean François Thomas ki te oblije demisyone sou presyon manifestan yo. Misye Dorcin pran angajman pou l kontinye travay pou ranfòse sektè agrikòl la.

Yon lòt kote, yon delegasyon palmantè ameriken --ki te gen nan tèt li Nancy Pelosi, lidè minoritè demokrat la nan Chanm Depite Lèzetazini an-- te vizite peyi Dayiti samdi 21 Fevriye pase a. Apre yon rankont ak diplomat yo nan Anbasad ameriken an nan Pòtoprens, delegasyon an te fè yon toune nan 2 pwogram Ajans Amerikèn Pou Devlopman Entènasyonal (USAID) ko-patwone. Delegasyon an te rankontre --antwòt ofisyèl-- Prezidan Michel Martelly, Premye Minis Evans Paul ak manm kabinè ministeryèl la. Palmantè ameriken yo te tou pwofite pou yo prezante kondoleyans bay otorite yo pou lanmò 17 moun pandan Kanaval Nasyonal 2015 la nan yon aksidan kote 78 lòt moun te blese.

Ansyen prezidan ameriken Bill Clinton twouve l ann Ayiti depi lendi 23 Fevriye 2015 pou yon vizit 48 tè. Ansyen prezidan an vizite plizyè pwojè Fondasyon Clinton ap finanse nan sektè divès sektè, tankou agrikoilti, tourism ak atizana. Anvan ansyen prezidan an kite Pòtoprens, li gen pou l asiste inogirasyon Otèl Marriot/Digicel nan kapital peyi d Ayiti a.

Fondasyon Clinton nan envesti 50 mil dola nan aktivite yon òganizasyon lokal nan Mirbalè pou ankouraje pwodiksyon bouji ak ekspòtasyon lwil palma-kristi ann Amerik di Nò, ann Ewòp ak lòt kote nan lemond.

Anfen, yon komisyon prezidansyèl kap travay sou preparasyon yon liv blan pou etidye fezabilite kreyasyon yyon fòs sekirite pou Ayiti, kòmanse, lendi 23 fevriye 2015 la, yon atelye travay 3 jou ak Junt Entè-Amerikèn Defans la nan kapital federal Lèzetazini an, Washington. Dapre minis afè etranjè ayisyen an, Duly Brutus, diskisyon yo deja rive nan etap ki gen pou debouche sou redaksyon yon dokiman final.

XS
SM
MD
LG