Accessibility links

Pap Franswa Selebre 2èm Mès Nwèl Li kòm Chèf Legliz Katolik

  • Ekip Sèvis Kreyòl VOA

Pap Franswa ki tap bay benediksyon tradisyonèl Nwèl la "Urbi et Orbi" pandan li te sou balkon Bazilik Sen Pyè a nan Vatikan. Dat: 25 desanm 2014.

Pap Franswa selebre mès minui nan Bazilik Sen Pyè-a, nan vil Wòm, nan okazyon 2èm seremoni anyèl li kòm Chèf Legliz Katolik Womèn nan. Se yon selebrasyon ki toujou dewoule pou make Fèt Nwèl la, youn nan pi gwo jou sakre nan tradisyon kretyen yo: li raple nesans Jezi Kri. Plizyè milye kretyen te rasanble sou Plas Sen Pyè a pou asiste seremoni an.

Nan omeli Souvren Pontif la prezante a (sa yo rele tradisyonèlman mesaj « urbi et orbi.», ki vle di yon mesaj ki sòti nan vil Wòm e ki al jwenn le mond antye), Pap la kondane sa l rele « pèsekisyon brital minorite yo ap sibi anba men gwoup Eta Islamik la nan Siri ak Irak, kote militan sa yo mete men sou yon gwo pati nan tèritwa 2 peyi sa yo. Pap la touche tou anpil lòt pwen nan aktyalite entènasyonal la, sitou nouvèl ki pale de konfli ak kriz mond aktyèl la ap konfwonte. Se konsa li lanse apèl pou l mande lapè nan peyi Ikrèn, Nijerya ak Repiblik Santrafrikèn, epi li kondane atak militan Taliban yo te lanse semèn pase a sou yon lekòl nan Pakistan, kote yo te touye plis pase 140 ti elèv.

Souvren Pontif la bay benediksyon li pou viktim epidemi ebola, espesyalman malad ak viktim nan peyi Liberya, Syera Leyòn ak Ginen, e li mande Bondye pou Li fè lapli benediksyon sa a tonbe tou sou pèsonèl medikal kap swaye malad yo.

Pandansetan, nan vil Bethlehèm, nan Si-Jodani, kretyen tout denominasyon ak pèlren ki sòti toupatou atravè lemond, rasanble pou yo asiste seremoni otorite palestinyen yo mete sou pye. Yon gwo pati nan resemoni relijye a dewoule nan Legliz Nativite a, ki sou Plas Krèch la, swa anplasman kote tradisyon di Jezi te pran nesans la. Tout bagay kòmanse ak yon defile ; nan tèt de fil defile sa a, nou jwenn kèk boy scouts ak girl scouts ki te kondui foul la jous nan Plas Krèch la. Pami moun ki te la pou gade defile a, nou jwenn yon pèlren lokal, yon palestinyen ki rele Soufyan Sobeck. Misye Sobeck, ki pale ak Lavwadlamerik, fè deklarasyon sa a :

« Pi fò moun yo kontan, paske jodi a se Nwèl. Se nan Bethlehèm nou ye la a ; se vil lapè a. Nou toujou genyen yon fason espesyal pou n selebre Nwèl. Ni mizilman, ni Kretyen, yo tout kontan nan jou Nwèl la ; paske, isit la, se pa kretyen sèlman ki selebere jou a. E mwen si e sèten nou pral pase yon jwaye Nwèl. »

Pandansetan, nan vil Jerizalèm, ann Izrayèl, kote Sovè a te pase pi fò tan li pandan 3 zan ministè li sou tè sa a, Patriyach Laten an, Fouad Twal, ki se achevèk Jerizalèm nan, te fè lapriyè jounen an an prezans plizyè santèn fidèl kretyen.

XS
SM
MD
LG