La Mezon Blanch di Prezidan Barack Obama byen kontan desizyon konpayi sinema Sony Pictures pran pou l pwojte yon film ki kritike lidè Kore di Nò a, Kim Jong Un, aprè konpayi an te anonse lap bloke distribisyon film nan. Se yon film ki pwovoke gwo pawol-anpil paske entrig la repoze, antwòt, sou yon plan pou ansasinen Misye Kim.
Tit Film nan se “The Interview” oubyen “Entèvyou a” . Semèn pase a Sony Pictures te di li anile grande première la ki te sipoze fèt nan sal sinema ameriken yo nan dat 25 desanm nan. Responsab yo te pran desizyon sa a aprè yon sous enkoni te lanse yon atak sou sit-entènèt konpayi an; sous sa a te menm lanse menas pou l di Sony Pictures tap genyen pou l sibi plis move konsekans toujou si l te pwojte film nan.
Sepandan, nan jounen madi 23 desanm 2014 la, konpayi an retounen sou desizyon an e li fè konnen “The Interview” pral pase nan dat anonse a (swa 25 desanm); men se nan yon kantite limite sal sinema sèlman. Administrasyon Obama a te fè sèman li ta pral reponn kif-kif pou atak yo te lanse sou sit-entènèt Sony Pictures la. Men otorite yo pa vle konfime ni demanti si se Lèzetazini ki te lakòz yon blackout total, pandan preske 10 zèdtan, sou tout sit-entènèt nan Kore di Nò lendi 22 desanmm nan. Pòtpawòl Depatman Deta a, Mary Harf fè deklarasyon sa a pandan yon rankont ak laprès:
« Mwen kite sa nan men Kore di Nò pou l di se sit-entènèt li yo tap opere oubyen si yo pa tap opere, e poukisa. Nou pa pral pale de kesyon sa a nan yon sans oubyen yon lòt ; nou pap reponn non plis kesyon kap mande eske Lèzetazini te reyaji e nan ki sans. E mwen ta vle mande nou fèt atansyon pou n pa panse, si m pa fè kòmantè sou dosye a, nou dwe entèprete pozisyon sa a nan yon sans oubyen yon lòt… »
Jous nan fen jounen mèkredi 24 desanm nan, Kore di Nò potko fè pyès deklarasyon sou enposiblite pou moun nan peyi a te antre sou entènèt la pandan anviwon 9 vèdtan nan fen jounen lendi a. Men otorite yo nan Pyongyang pale fò pou yo di se swa jamè, se pa yo ki te atake sit-entènèt konpayi sinema Sony Pictures.