Accessibility links

Rezolisyon l’ONU kont Kore di Nò pou Vyolasyon Dwamoun.

  • Ekip Sèvis Kreyòl VOA

Lidè Kore di Nò a, Kim Jong Un. (Foto: REUTERS/KCNA)

Asanble jeneral Oganizasyon Nasyon Zini an vote yon rezolisyon ki egzije peyi Kore di Nò prezante devan Tribinal Entènasyonal Jistis la pou l jije pou vylason dwamoun li komèt. Anbasadè nò-koreyen an nan l’ONU, An Myong Hun, pat pèdi tan pou l reyaji. Diplomat la di:

« Rezolisyon sa a montre Nasyon Zini ak moun kap swiv li yo toujou dispoze jete vèni sou do rejim nou an, detwi ideyoloji nou an ak tout sistèm nou an, sou pretèks yap defannn dwa kretyen vivan. »

Rezolisyon an, ki pa gen fòs yon lwa e ki pase fasilman nan jounen jedi 18 desanm 2014 la, lanse yon apèl prese bay Konsèy Sekirite a pou mande l refere Kore di Nò devan tribinal Lahè a pou krim kont limanite. Lendi pwochen (22 desanm) Konsèy Sekirite a pral òganize yon sesyon sou dosye dwamoun Pyongyang. Sepandan, sanble pap gen posiblite pou l voye afè a devan tribinal la, paske siman Lachin –ki se pi gwo patnè Kore di Nò- pral sèvi ak dwa veto li pou l bloke yon desizyon konsa.

Rezolisyon an baze sou yon ankèt Komisyon Dwamoun l‘ONU an te fè nan mwa fevriye 2014 la, kote li te detaye tout yon seri vyolasyon dwa kretyen vivan Kore di Nò komèt pandan plizyè dizèn dane… tankou egzekisyon san jijman, zak kraze zo, kadejak ak yon politik ki lakòz moun ret mouri grangou pa bann e pa pakèt.

XS
SM
MD
LG