Accessibility links

Apèl Pap Franswa pou Lidè Peyi Mizilman yo: "Kondane Zak Teworis"

  • Ekip Sèvis Kreyòl VOA

Pap Franswa (agoch) ap bay Patriyach Ekimenik Bartholomew Premye yon akolad apre yo te fin siyen yon deklasyon an tèt-ansanm nan Legliz Sen Jòj la, prensipal katedral Otodòks Grèk la, nan dat 30 Novanm 2014 la, nan Istanboul, peyi Tiki, kote li fè yon vizit 3 jou.

Pap Franswa lanse apèl bay lidè peyi mizilman yo pou l mande yo kondane zak teworis kap fèt nan non relijyon Islam nan.

Pandan Souvren Pontif la tap pale ak yon gwoup jounalis nan avyon li, ki tap sòti nan vil Istanboul, nan peyi La Tiki, pou retounen avèk li nan vil Wòm, li fè konnen si lidè peyi mizilman yo fè sa l mande a, sa ta kapab chanje lide moun nan mond oksidantal la ki panse Lislam se menm bagay ak teworism. Pap la di:

“Pou sa k konsène move santiman moun genyen kont Lislam nan, se vre ke lè moun wè zak teworis sa kap fèt non sèlman nan rejyon an, men tou ann Afrik, reyakyon yo sè mande : Eske se sa ki Lisman nan? Alòs, sa revolte yo. Se konsa anpil mizilman fache; anpil nan yo deklare: “Se pa sa ki reprezante Lislam; paske liv sakre nou an --Koran an-- se yon liv lapè. Se yon liv pwofetik ki preche lapè. Teworism pa menm bagay ak Lislam.”

Mesaj pap la vini nan moman militan estremis Gwoup Eta Islamik la gen plizyè mwa deja depi yap chache tabli enfliyans yo sou plizyè pati nan peyi Irak ak Siri kote yo fòse mizilman chiyit, kretyen, ak moun lòt relijyon kouri kite rejyon kote yo tap viv la --lè se pa touye yo touye yo-- paske tou senpleman moun sa yo pa apiye fason radikal yo menm, mizilman sinit, yo entèprete relijyon islamik la.

XS
SM
MD
LG