Accessibility links

Irak-Politik : Premye Minis Nouri al-Maliki Bay Demisyon L.

  • Ekip Sèvis Kreyòl VOA

Manm palman irakyen an ap tande Premye Minis Nouri al-Maliki (nan mitan) pandan li tap li yon mesaj kote li anonse demisyon n aprè 8 tan li pase kòm chèf gouvènman an (Bagdad, 14 out 2014).

Nouvèl ki sòti Bagdad fè konnen Irak pral genyen yon nouvo gouvènman apre demisyon premye minis sòtan an, Nouri al-Maliki. Misye Maliki prezante byen ta jedi devan palman an pou l anonse li deside kite plas la pou premye minis prezidan Fouad Massoum te deziye pi bonè nan semèn nan, vis prezidan chanm bas palman an, Haidar al-Abadi. Misye al-Maliki di :

«Map anonse devan nou jodi a mwen retire kandidati mwen pou yon lòt manda nan pòs premye minis la anfavè frè mwen, Doktè Haidar al-Abadi, yon fason pou m fasilite evolisyon pozitif pwosesis politik la ak fòmasyon yon nouvo gouvènman. »

Anons Misye Maliki fè a vini nan moman li te anba gwo presyon entènasyonal pou l kite pòs chèf gouvènman an aprè li te echwe nan misyon li te genyen pou l ini divès ektè politik, relijye ak etnik ki genyen nan Irak yo (swa chiyit -gwoup etnik pa li a-, sinit ak minorite kird la) pandan 8 tan li pase nan tèt Leta irakyen an.

Pandansetan, nan Washington, Prezidan Barack Obama fè konnen lame amerikèn nan pral kontinye lanse atak ayeryen nan pati nò Irak pou l pwoteje pèsonèl ak enstalasyon militè Lèzetazini genyen laba a pandan lap apiye tranzisyon politik la nan peyi a. Prezidan Obama deklare :

« Nou ogmante livrezon asistans militè nou pou Irak e pou fòs kurd yo kap goumen sou chandbatay yo kont militan islamik yo. Sa ki petèt pi enpòtan toujou, sè ke nap ankouraje irakyen yo pou yo mete tèt yo ansanm pou yo ranpòte laviktwa sou militan islamik yo. Pou yo fè sa, yo dwe sezi bèl okazyon yo genyen pou yo fòme yon nouvo gouvènman kote tout moun gen plas yo bò tab la sou direksyon premye minis deziye a, Misye Abadi. »

Prezidan Obama kontinye pou l di aksyon aviyasyon militè Lèzetazini an nan pati nò Irak rive kraze syèj militan islamik yo te tabli ozalantou yon montay kote plizyè manm minorite relijye ak etnik te ale pran refij akoz goumen ki tap dewoule nan zòn nan.

XS
SM
MD
LG