Accessibility links

Vyolans la Kontinye nan Gaza Malgre yon Seselfe

  • Ekip Sèvis Kreyòl VOA

Yon fanm Palestinyèn kenbe yon pititgason li pandan moun vil Beit Hanoun, nan pati nò Bann Gaza, ap retounen lakay yo (Foto AP, vandredi premye out 2014).

Daprè nouvèl ki sòti sou Bann Gaza a, otorite yo fè konnen atak lame Izrayèl la lanse touye 4 palestinyen pou piti 2 zèdtan sèlman apre kòmansman yon seselfe ki te dwe dire 3 jou. Menm sous la ajoute tank militè izrayelyen ouvè kout-zam sou kèk zòn ki tou pre vil Rafah, nan pati sid Gaza, byen bonè vandredi premye out la.

Yon lòt kote, sirèn sonnen nan vil Kerem Shalom, nan pati sid Izrayèl, akoz sa k sanble yon atak ak kout-wòkèt militan palestinyen yo lanse sou vil la. Biwo Premye Minis Benjamin Netanyehu fè parèt yon deklarasyon kote li akize militan Hamas yo deske yo komèt sa dokiman an konsidere kòm “yon vyolasyon flagran” seselfe imanitè a, menmsi deklarasyon an pa bay twòp detay.

Hamas, li menm, poko fè okenn kòmantè sou repriz vyolans la ki rive apre preske 4 semèn batay ki koze lanmò plis pase mil 400 palestinyen. Byen ta jedi, Izrayèl te anonse 5 nan sòlda li yo mouri nan yon atak ak kout-mòtye --sa ki fè kantite manm lame Izrayèl la ki pèdi lavi yo nan batay yo monte rive 61. Atak palestinyen yo touye tou 3 silvil izrayelyen.

Seselfe imanitè 2 pati yo te anonse jedi te sipoze anpeche tou lè 2 kan yo poze okenn aksyon militè. Sepandan, Izrayèl di lap kontinye operasyon li lanse pou l elimine tout tinèl militan palestinyen yo itilize pou yo fè zam antre nan kontrebann sou tèritwa li, oubyen pou yo komèt zam vyolans. Stephanie Dujarric, pòt-pawòl Sekretè Jeneral Oganizasyon Nasyon Zini an, Ban Ki-moon, bay detay sou objektif seselfe a. Madam Dujarric di:

“Pandan peryòd seselfe a, sivil yo nan Gaza pral resevwa an ijans yon soulajman imanitè yo tèlman bezwen, e yo pral gen okazyon pou yo fè kèk travay enpòtan –tankou, pa egzanp, antere manm fanmi yo ki mouri yo, pran swen moun ki blese yo epi mete provizyon manje lakay yo. Pandan peryòd sa a tou, yo kapab repare yon sitèm dlo ak kouran elektrik trè zenpòtan ki te dwe repare depi lontan deja.”

Pi ta nan jounen vandredi a, 2 delegasyon --youn pou Izrayèl e lòt la pou Palestinyen yo-- prale nan vil Lekèr, nan peyi Lejip, pou yo fè negosyasyon sou prensipal koz konfli ki pete ant 2 kan yo. Yon delegasyon diplomat ameriken gen pou patisipe tou nan negosyasyon sa yo.

XS
SM
MD
LG