Accessibility links

Faz Dechoukaj Koup di Mond Brezil 2014 la ap Demare Samdi 28 Jen.

  • Jean-Robert Philippe

Prezidan brezilyen an, Dilma Rousseff, ap admire trofe koup di mond la nan Brazilya. (Foto 2 jen 2014.

Vandredi 27 jen an se yon jou repo pou seleksyon nasyonal ki kalifye pou faz dechoukaj koup di mond la. Peyi ki elimine yo ap retounen lakay yo anvan 2èm pati konpetisyon yo demare samdi 28 jen an.

16 peyi ki elimine yo: Kwasi ak Kamewoun nan group A a; Espay ak Ostrali nan gwoup B a; Kot Divwa ak Japo nan gwoup C a; Itali ak Langletè nan gwoup D a; Ekwatè ak Ondiras nan gwoup E a; Bosni Ezegovin ak Iran nan gwoup F la; Pòtigal ak Gana nan gwoup G a epi Larisi ak Kore di Sid nan gwoup E a.

Pèfòmans manm Konfederasyon FIFA yo nan koup di mond sa a epi kisa sa vle di pou kantite patisipan ki kalifye pou faz dechoukaj la.

Unyon Foutbòl Ewopeyen an gen 6 kalifye sou 13; KONKAKAF gen 3 peyi sou 4 ki rete nan kous la; Azi gen 0 sou yon total 4 patisipan; CONMEBOL (Konfederasyon Footall Amerik di Sid la) : 5 sou 6; Konfederasyon Football Afriken an: 2 sou 5.

Sitwayen ameriken yo te pran yon ti tan nan travay yo ou byen nan lòt aktivite yo tap mennen pou yo te swiv match Etazini -Almay la, yon rankont ameriken yo pèdi sou yon skò 1 a 0, yon rezilta ki pa anpeche yo jwenn kalifikasyon yo pou pwochen tou mondyal la. Prezidan Barack Obama te swiv rankont la abò avyon prezidansyèl la, Air Force One, nan moman li te an vwayaj. Nan Plizyè vil Ozetazini, ameriken te reyini sou plas piblik pou yo swiv retransmisyon rankont la. Byen anvan match la, astwonòt ameriken ak alman ki abò yon navèt ki twouve l nan lespas te choute balon pou senbolize dyèl ki ta pral dewoule ant 2 peyi yo.

Men kijan sitiyasyon an prezante nan faz dechoukaj la k ap demare samdi 28 jen an : A midi, 11 nasyonal Brezil la pral rankontre ak seleksyon nasyonal Chili a nan Belo Horizonte epi a 4 trè Kolonbi ak Irigwe pral monte teren an nan Rio de Janeiro.

Dimanch a midi, La Oland ak Meksik pral tope kòn yo nan Fortaleza epi a 4 trè Kosta Rika pral woule balon devan Lagrès.

Lendi 30 jen, La Frans ak Nijerya pral rankontre nan Brazilya epi a 4 trè Lalmay pral konfwonte Aljeri nan Porto Alegre.

Madi 1e jiyè, nap gen Ajantin kont Laswis nan Sao Paolo epi, nan apre midi, Beljik pral jwe ak seleksyon Lèzetazini nan vil Salvador. \

Gayan rankont sa yo ap kalifye pou kar de final la k ap kòmanse vandredi 4 jiyè alòske pèdan yo pral oblije retounen nan peyi yo.

Lòt nouvèl ki gen rapò ak koup di mond la: 3 antrenè ki pi byen touche pami 32 peyi patisipan yo elimine depi nan premye tou konpetisyon an. Italyen Fabio Capello, k ap antrene seleksyon nasyonal ris la, ap touche plis pase 11 milyon dola. An 2è pozisyon nou jwenn antrenè seleksyon nasyonal anglèz la, Roy Hodgson, ki resevwa plis pase 5 milyon dola; epi Italyen Cesare Prandelli ap touche plis pase 4 milyon dola. Antrenè k ap touche pi piti lajan pami 32 antrenè yo, se meksiken Miguel Herrera ki resevwa mwens pase 210 mil dola.

FIFA leve sanksyon 90 jou li te enpoze sou alman Franz Beckenbauer 13 jen pase a pou l pat patisipe nan okenn aktivite ki gen rapò ak foutbòl apre li te refize kowopere ak yon ankèt k ap fèt sou akizasyon kòmkwa sanble te genyen koripsyon nan vòt ki te fèt pou chwazi peyi ki pral òganize koup di mond 2018 la ak chanpyona mondyal 2022 a. Otorite FIFA yo mete Beckenbauer okouran desizyon an nan dat vandredi 27 jen an e yo fè misye konnen se yon desizyon kap antre an aplikasyon imedyatman.

Beckenbauer te fè konnen se avèk sipriz li te aprann desizyon FIFA a te pran pou mete sanksyon sou do l, paske kesyon anketè yo te mande l reponn yo, te ekri an angle e sete yon langaj jiridik ki difisil pou yon moun ki pa pale lang la konprann. Li te reponn kesyon yo apre yo te tradwi yo an alman; petèt te gen kèk ti erè nan tradiksyon an.

Nan mesaj Premye Minis bèlj la, Elio Di Rupo, pibliye sou kont Twitter li, li pwomèt pou l bay Prezidan Barack Obama kèk boutèy byè bèlj kòm kado si La Bèljik kale Lèzetazini nan faz dechoukaj la. Jiska vandredi 27 jen an, nan maten, Prezidan Obama potko di si wi ou non l ap aksepte òf sa a.

-----------------------------------------------------------------------

Nouvèl konsènan baskètbòl pwofesyonèl la Ozetazini: Tiraj osò pou rekrite nouvo jwè pou sezon 2014-2014 la dewoule jedi 26 jen an nan Brooklyn, New York. Cleveland Cavaliers, ki te pase yon move sezon, chwazi kandida nimewo 1 an, yon etidyan Inivèsite Kansas ki rele Andrew Wiggins. Milwaukee Bucks seleksyone kandida nimewo 2 a, Jabari Parker, ki soti nan Duke University. Philadelphia 76er pral resevwa jwè nimewo 3 a, Joel Embiid, ki sòti nan Inivèsite Kansas. Nimero 4 la, Aaron Gordon, ki te konn jwe nan Inivèsite Arizona, pral jwen Orlando Majik.

XS
SM
MD
LG