Accessibility links

L’ONU-Diplomasi : Efò Ban Ki-moon pou Rezoud Kriz la nan Ikrèn - Washington Anonse plis Sanksyon kont Moskou

  • Ekip Sèvis Kreyòl VOA

Sekretè Jeneral l'ONU an, Ban Ki-moon (a goch) ap bay lanmen ak Prezidan Ris la, Vladimir Putin, pandan yon vizit nan Kremlen an nan Moskou. (Foto: Jedi 20 mas 2014).
Sekretè Jeneral l’ONU an, Ban Ki-moon, twouve li nan vil Kyèv pou yon misyon diplomatik li kòmanse jedi 20 mas 2014 la pou l eseye mete fen nan kriz ki pete aprè Larusi anekse preskip Krime a, ki te fè pati Ikrèn. Nan jounen jedi a, Misye Ban te rankontre nan vil Moskou ak lidè ris la, Vladimir Putin, pou l te ankouraje li sèvi ak dyalòg pou rezoud kriz ki pete ant Larisi ak Ikrèn nan.

Rankont Moskou a dewoule nan menm jou kote minis defans ameriken an, Chuck Hagel, te anonse li jwenn garanti nan men kòlèg ris li a, minis defans Sergei Shoigou, kòmkwa twoup militè ris ki pran pozisyon bò fwontyè Larisi ak Ikrèn nan, pa gen plan pou yo travèse fwontyè a. Laprès nan Washington resevwa konfimasyon deklarasyon sa a nan men pòt-pawòl Pentagòn nan, vis-amiral John Kirby nan menm jounen 20 mas la. Vis-Amiral Kirby di :

« Minis Hagel fè presyon tou sou Minis Shoigou pou l bay eksplikasyon sou entansyon Larisi gen nan tèt li lè l voye tout twoup militè sa yo al kanpe bò pati lès ak sid fwontyè li ak Ikrèn. Se konsa tou, Misye Hagel repete yon apèl li te deja lanse pou l mande Larisi kòmanse travay imedyatman pou l rezoud kriz la epi retabli entegrite teritoryal Ikrèn. » .

Bò kote pa l, Prezidan Barack Obama anonse Washington ap pran kèk sanksyon tout nèf kont Moskou poutèt sitiyasyon li kreye nan Ikrèn nan. Pandan Misye Obama te pran lapawòl sou dosye a nan Jaden Woz Lamezon Blanch la nan menm jounen jedi a, li fè konnen li enpoze nouvo sanksyon sou plis ototite ris ki mele nan okipasyon Preskil Krime a. Prezidan ameriken an deklare :

« Nou travay an kolaborasyon ak patnè ewopeyen nou yo pou n ka pran aksyon ki pi sevè si Larisi kontinye agrave sitiyasyon an. Nan kad pwosesis sa a, mwen siyen jodi a yon lòd egzekitif ki otorize sanksyon non sèlman sou otorite ris yo, men tou sou kèk sektè-kle nan ekonomi ris la. »

Anvan anons Prezidan Obama fè nan matine jounen jedi a, Lezetazini te pran sanksyon limite sou vwayaj ak aktivite ekonomik ki te konsène 21 pèsonalite ris ki mele nan aksyon Kremlin an poze nan Ikrèn nan. Lidè ameriken an ajoute se pa yon desizyon administrasyon n nan pran avèk plezi.

« Se pa desizyon final nou ta pi renmen an. Paske sanksyon sa yo pral genyen move konsekans non sèlman sou ekonomi ris la, men tou yo ka fè gwo dega nan ekonomi mondyal la. Sepandan Larisi fèt pou l konnen, si li fè sitiyasyon an vin pi grav toujou, sa pral izole li plis toujou vizavi kominote entènasyonal la. »

Prezidan Obama di, yon lòt gwo priyorite administrasyon n nan, se kontinye bay nouvo gouvènman Ikrèn nan asistans pou l ka estabilize ekonomi li e satisfè nesesite de baz pèp ikrenyen an. Lidè ameriken an anonse li prale ann Ewòp semèn pwochèn nan pou l patisipe nan somè G-7 la ansanm avèk alye ewopeyen ak azyatik li yo. Anfen, Misye Obama mande kongrè a pase alaksyon rapidman pou l adopte lwa ki nesesè pou mete plis èd a la dispozisyon sitwayen ikrenyen yo.
XS
SM
MD
LG