Accessibility links

Kè-Sote nan l’ONU devan Sitiyasyon an nan Ikrèn

  • Ekip Sèvis Kreyòl VOA

Youn nan reyinyon Konsèy Sekirite l'ONU an sou sitiyasyon an nan Ikrèn. Anbasadè Larisi Vitaly Churkin (agoch) ap koute anbasadè Lèzetazini an, Samantha Power.
Manm Konsèy Sekurite Oganizasyon Nasyon Zini yo fè, lendi 10 mas 2014 la, 5èm reyinyon yo nan 10 jou sou sitiyasyon an nan Ikrèn. Tèm deba yo se sa yo konsidere kòm tandans Larisi pou l anekse preskil Krimé, yon rejyon nan Ikrèn.

Premye minis pwovizwa ikrenyen an, Arnesy Yatsenyuk, byen kapab vizite katye-jeneral l’ONU an semèn sa a nan New York (jedi 13 mas 2014 la) pou l chache apui òganizasyon entènasyonal la anvan yon referandòm ki gen pou dewoule dimanch pwochen sou kesyon pou konnen eske Krime dwe kite Ikrèn pou l pase anba lobedyans Moskou. Anvan vizit l'ONU an, Misye Yatsenyuk pral rankontre ak prezidan ameriken an, Barack Obama, nan jounen mèkredi 12 mas la.

15 manm Konsèy Sekurite a òganize lendi yon rankont prive kote chèf politik l’ONU an, Jeffrey Feltman, ak anbasadè ikrenyen an nan òganizasyon an, Yuriy Sergeyèff, ba yo yon kont-randi sou evolisyon sitiyasyon an nan Ikrèn. Prezidan Konsèy la, anbasadè Luksanbour la nan l’ONU, Sylvie Lucas, fè laprès konnen anpil nan manm konsèy la lanse lide pou pati konsène yo mete dlo nan diven yo, an menm tan ke li lanse apèl pou li mande respè souverènte, entegrite teritoryal ak endepandans politik Ukrèn.

Madam Lucas ajoute desizyon Konsèy Siprèm Krime a pran pou l mete sou pye yon referandòm ki ka lakòz Krime separe ak rès Ikrèn, se yon desizyon ki vyole konstitisyon peyi-a ; kidonk, daprè li, se yon desizyon ilegal. Bò kote pa l, anbasadè Lafrans nan l’ONU, Gérard Araud, atire atansyon sou le fèt ke sitiyasyon an nan Ikrèn ap vin pi mal chak jou. Misye Araud di:

“Lame ris la ap ranfòse prezans li nan Krime. Lame ris la antoure e lap pran daso enstalasyon lame Ikrèn nan. Yo wete nan lè a tout kanal televizyon ki pale lang ikrenyèn nan. Epi kounyela a, nou genyen yon referandom ke, an fèt, Larisi ap òganize. ”

Diplomat fransè a lanse apèl bay Larisi pou mande l patisipe nan negosyasyon kap fèt sou sitiyasyon an nan Ikrèn, paske, daprè Gérard Araud, si Moskou anekse Krime, sa pral kreye yon sitiyasyon ekstrèmman grav e sa pral genyen move konsekans sou relasyon Larisi ak rès mond la. Sou pwen sa a, anbasadè britanik la nan l’ONU, Mark Lyall Grant, fè konnen Larisi ap vin pi izole chak jou ; li lanse apèl pou l mande Moskou wete twoup militè li yo nan Krime epi kite yon gwoup obsèvatè entènasyonal ap sipèvize sitiyasyon an sou preskil la. Anbasadè Lyall Grant deklare:

“Nan moman kote Larisi ap plede di li gen kè-sote devan menas ki swadizan ap peze sou moun ki pale ris nan Ikrèn ak lòt kote, tankou Krime, li pa kite okenn obsèvatè entènasyonal antre laba a, alòske wòl obsèvatè sa yo se jisteman bay nouvèl sou sa kap pase vrèman sou teren an.”

Chèf misyon diplomatik britanik la nan l’ONU kontinye pou l di responsab politik òganizasyon an, Jeffrey Feltman, ak lòt obsèvatè ki fèk vizite Ikrèn, pa wè okenn siyn ki ta fè wè moun ki pale ris yo ta viktim okenn move zak; men tansyon an pa sispann monte akoz prezans militè Larisi nan peyi a.
XS
SM
MD
LG