Accessibility links

Breaking News

Kòmansman Chita-Tande nan Laswis sou Kriz Siri a ant Gouvènman an ak Opozisyon an


Negosyasyon sou Siri
Negosyasyon sou Siri
Anvwaye espesyal l’ONU/Lig Arab la pou Siri, Lakhdar Brahimi, ap rankontre jedi 23 janvye 2014 la avèk reprezantan gouvènman Prezidan Bashar al-Assad la e avèk delege opozisyon an nan Jenèv, nan kad efò lap fè kom medyatè pou l eseye mete fen nan yon gè sivil ki la depi preske 3 zan.

Misye Brahimi ap fè chita-tande separe ak reprezantan 2 pati yo epi abòde avèk yo fason pou yo debouche sou pwochen etap negosyasyon yo. Chita-tande jedi a te fikse pou yon jou pi ta, vandredi 214 janvye a; sepandan, nan jounen mèkredi-a --jou kote yon konferans lapè te dewoule nan vil Montreux, nan Laswis-- anvwaye espesyal la te fè konnen rankont separe yo kapab kòmanse imedyatman.

Misye Brahimi te kontinye pou l di gen siyn klè ki montre gouvènman siryen an ak opozisyon an pare pou yo pale de sitiyasyon imanitè a, liberasyon prizonye yo, epi aksepte yon sesel-fe nan kèk rejyon an. Premye jounen chita-tande lapè yo te gen patisipasyon anviwon 40 delegasyon nan Montreux, e pwen ki te domine yo, se yon divizyon total-kapital sou kesyon pou konnen eske Prezidan Bashar al-Assad gen yon wòl pou l jwe nan avni peyi Siri.

Pandansetan, sitwayen siryen ki kouri kite peyi yo akoz gè sivil la, gen yon mesaj klè pou negosyatè 2 kan yo ki reyini nan Laswis. Fatma Hassan, yon refijye siryèn kap viv nan peyi Tiki, pale nan lang arab la pou l di :

“Sa nou mande rejim sisyen an ak opozisyon an, se pou yo mete awogans yo sou kote, epi jwenn yon antant pou yo mete fen nan lagè a. Nou bezwen yon desizyon final. Kit se anvwaye l’ONU ak Lig Arab la, kit se yon lòt moun ki sèvi kòm medyatè, nou pa bezwen konnen; sa nou vle, se yon fen nan lagè a.”

Bò kote pa l, ansyen anbasadè ameriken nan peyi Siri, Theodore Kattouff, fè konnen youn nan pi gwo pwoblèm ki poze yo, se lefèt ke grand puisans mondyal yo pa ka rive antann yo sou kesyon pou konnen kisa ki reprezante pi bon solisyon an pou sitiyasyon an nan Siri.

Ansyen diplomat la atire atansyon sou le fèt ke Lachin ak Larisi apiye rejim Assad la; tandiske pi fò lòt puisans yo mande pou Assad kite pouvwa a kòm kondisyon pou yon tranzisyon politik pote chanjman pozitif nan Siri. Sepandan, okenn nan gwo peyi yo, ni Nasyon Zini, pa dispoze voye twoup militè sou teren an nan peyi-a. Ansyen anbasadè Theodore Kattouff deklare:

“Sitiyasyon sa a vle di rezilta negosyasyon yo pral depann de ekilib fòs yo sou teren an nan Siri menm : ekilib ant diferan gwoup opozisyon an ak rejim nan. E jounen jodi a, kisa nou wè? Se yon sòt de enpas, yon blokaj. Okenn nan 2 fòs sou teren an pa sanble li kapab bat lòt la; okenn nan yo pa ka enpoze pozisyon l sou lòt la. Avèk yon sitiyasyon konsa, enpas la kapab kontinye endefiniman, avèk refijye kap soufri, prizonye yap kraze zo, moun kap pèdi lavi yo pandan lontan ankò...”

Tankou ansyen anbasadè Lèzetazini nan Damas, Theodore Kattouff, di sa la a, sitiyasyon ki prezante nan Siri jounen Jodi a, se yon sitiyasyon ki grav anpil. E moun kapab konprann obsèvatè ki di yo pa plase twòp espwa nan rankont kap dewoule nan peyi Laswis ant reprezantan 2 gwoup belijran yo avèk anvwaye espesyal l’ONU/Lig Arab la, Lakdar Brahimi.
XS
SM
MD
LG