Accessibility links

L’ONU Envite Iran nan Negosyasyon Lapè sou Siri

  • Ekip Sèvis Kreyòl VOA

Minis afè etranjè Iranyen an, Mohammad Javad Zarif, rankontre ak Sekretè Jeneral Ban Ki-moon sou sitiyasyon an nan Siri.
Oganizasyon Nasyon Zini envite ofisyèlman peyi Iran pou l patisipe nan yon konferans entènasyonal sou lapè nan Siri --yon konferans moun ap tann depi byen lontan e ki fikse pou kòmanse mèkredi 22 janvye 2014 la nan peyi Laswis –pi presizeman nan vil Montreux.

Pandan Sekretè Jeneral l’ONU an tap abòde dosye a ak laprès dimanch, li fè konnen li gen konviksyon Iran ta dwe fè pati rechèch solisyon pou sitiyasyon an nan Siri. Misye ajoute minis afè etranjè iranyen an, Javad Zarif, ba li asirans reponsab diplomasi iranyèn yo byen konprann rezon-dèt negosyasyon lapè yo. Dirijan l’ONU an di :

« Minis afè etranjè Zarif avèk mwen, nou dakò pou n rekonèt objektif negosyasyon yo se tabli yon konsantman jeneral sou fòmasyon yon gouvènman tranzisyon ki genyen plen pouvwa pou l dirije peyi a. Se sou baz sa a minis Zarif pran angajman pou Iran jwe hon wòl pozitif e konstriktif nan negosyasyon ki pral dewoule nan Laswis yo. »

Nan yon konferans entènasyonal pou lapè ki te dewoule nan lane 2012, Iran te rejte objektif patisipan yo te vle fikse pou chita-tande Laswis yo; paske, daprè sa iranyen yo te konprnan, gouvènman tranzisyon patisipan yo tap pwopoze a, pa tap prevwa okenn wòl pou prezidan siryen an, Bashar al-Assad, ki se yon gwo alye Teheran.

Prensipal gwoup opozisyon an, Kowalisyon Nasyonal Siryen an, di plizyè fwa li pa vle Iran patisipe an konferans la; nan yon mesaj gwoup la pibliye su Twitter, li di kareman li pral bòykote rankont Laswis la si Sekretè Jeneral Ban Ki-moon pa anile envitasyon n nan.
XS
SM
MD
LG