Accessibility links

Negosyasyon yo ap Kontinye sou Kriz la nan Soudan Sid

  • J. Lyonel Desmarattes

De goch a dwat: Premye Minis etyopyen an, Hailemariam Desalegn, Prezidan sid-soudanè a, Salva Kiir, avèk Prezidan kenyan an, Uhuru Kenyatta, ki tap rankontre nan kapital Soudan Sid la, Jouba. (Foto: 26 desanm 2013).


Lidè divès peyi afriken reyini nan Nayewobi, kapital Kenya, vandredi 27 desanm 2013 la, pou yon 2èm round negosyasyon pou yo chache jwenn yon solisyon pou kriz politik la nan Soudan Sid kote goumen pa sispann ant fòs gouvènmantal yo ak yon militant yon gwoup rasyal rival. Pandan negosyasyon yo ap dewoule a, 2 gwoup belijeran yo ap livre yon batay fewòs pou kontwol vil Malakal ki sou Delta Flèv Nil la.

Kèk negosyatè afriken te rankontre jedi avèk prezidan sid-soudanè a, Salva Kiir, nan capital la, Jouba, kote yo abòde mwayen pou yo mete fen nan latwoublay ki egziste nan peyi a. Premye Minis etyopyen an, Hailemariam Desalegn, te pami lidè afriken ki patisipe nan rankont sa a. Misye Desalegn di:

« Kesyon retablisman lòd la te pami tèm dikisyon yo. Youn lot tèm se yon seselfe; yon 2èm se yon dyalòg oubyen negosyasyon ki dwe fèt imedyatman pou n jwenn yon solisyon politik pou sitiyasyon an; yon 3èm se sitiyasyon prizonye yo ki, daprè sa kèk moun sispèk, ta mele nan yon tantativ kou-deta; epi yon 4èm pwen se kriz imanitè-a. »

Toujou sou dosye kriz sid soudanè-a : Oganizasyon Nasyon Zini anonse yon plan pou l ranfòse efektif gad-mentyen lapè li genyen nan peyi a nan 2 semèn konsa. Anvwaye espesyal l’ONU pou Soudan Sid la, Hilde Johnson, ensiste sou enpòtans efò òganizasyon mondyal la ap deplwaye pou l ranfòse twoup li yo nan peyi a pou l pwoteje popilasyon sivil la. Madam Johnson deklare :

« Mwen bat bravo pou rezolisyon Konsèy Sekirite a pran pou l ranfòse efektif fòs mentyen-lapè a (militè ak polisye) avèk yon kontenjan adisyonèl 5 mil 500 zòm… mete sou elikoptè militè ak lòt resous materyèl ak imen ki pral kore kapasite misyon nou an pou l pwoteje sivil yo epi jwenn mwayen natirèlman pou li reyalize manda li. Pou le moman, sitiyasyon an depase twoup nou yo ; se yon sotiyasyon kote nou pa kapab satisfè obligasyon pou n pwotejej sivil ki nan kan nou yo; paske, jan bagay yo ye la a, se pa tout tan nou ka garanti sekirite yo. »

Daprè chif l’ONU bay, jiskaprezan gen plis pase mil moun ki mouri nan zak vyolans yo ki mete fas-a-fas gwoup etnik Prezidan Salva Kiir la (ki sòti nan ras Dinka) avèk gwoup etnik rival li, ansyen vis prezidan Riek Machar, ki sòti nan ras Nuer.
XS
SM
MD
LG