Accessibility links

Ansyen Prezidan Sid Afriken, Nelson Mandela, Desede. Li te gen 95 zan

  • Ekip Sèvis Kreyòl VOA

Prezidan Afrik di Sid, Jacob Zuma, anonse lanmò idòl nasyonal Sid Afriken an, Nelson Mandela nan yon mesaj plen emosyon li delivre jedi 5 desanm pou pèp afriken an e pou lemond.

Nouvèl la se pa yon sipriz paske mesye Mandela te entène lopital plizyè fwa pandan ane a. Ansyen prezidan an ki te gen 95 zan te viv yon vi chaje defi e chaje avèk difikilte.

Mesye Mandela te yon jèn lidè chaje ak enèji lè otorite sid afriken yo te entèdi ANC a (Kongrè Nasyonal Afriken) mouvman ki tap lite kont rejim rasis, rejim Apartheid blan yo t ap dirije nan peyi a.

Defen lidè Sid Afriken te dirije branch ame ANC a, yon desizyon ki ta pral fèl pran yon tou prizon pandan 27 an. 27 ane sa yo sete jou pi nwa nan lavi Nelson Mandela ak nan istwa Afrik di Sid.

Men popilarite ak karism li te pèmèt lidè "anti-apartheid" la mentni detèminasyon li e dirije batay li t ap mennen an depi anndan selil prizon kote l te fèmen an. Li te sòti an triyonf aprè ke l te ede kapote rejim apartheid la. Mesye Mandela te eli prezidan aprè sa nan premye eleksyon tout pati prezan ki te dewoule nan Afrik di Sid an 1994.

Li te fè sèlman yon sèl manda sou pouvwa a, men se pou lit manch long li te mennen nan lavil kont diskriminasyon ak segregasyon rasyal lemond pral sonje l. Yo pral sonje l kòm: yon konbatan e kòm yon prizonye ki vinn yon chèf deta, e y ap sonje l tou kòm yon nonm lapè.

Se aktyèl prezidan Afrik di Sid la, Jacob Zuma, yon nonm jeneralman ki toujou de bòn imè ki pat resi kache emosyon ak lapèn li ki te gen misyon anonse sid afriken yo avèk lemond, nouvèl lanmò ansyen prezidan Nelson Mandela ---pèsonaj anpil Sid Afriken konsidere kòm papa nasyon yo a.

Mesye Zuma deklare: "Nou gen nan panse nou plizyè milyon moun atravè lemond ki te konsidere Madiba (ti non yo bay mesye Nelson Mandela nan Afrik di Sid) kòm lidè yo e ki te wè kòz li t ap defann nan kòm kòz pa yo.
Nasyon nou an pèdi pi gran pitit li a. Sa k fè mesye Mandela gran se egzakteman sa ki te fèl yon "etre-humain". Nou te wè nan li sa n ap chèche nan nou menm nan, e nan li menm nou te wè pwòp tèt nou."
XS
SM
MD
LG