Accessibility links

Etazini/Lachin : Vizit Vis Prezidan Ameriken Joe Biden nan Peken

  • Ekip Sèvis Kreyòl VOA

Prezidan chinwa a, Xi Jinping (adwat) ap bay Vis Prezidan ameriken an, Joe Biden, lanmen pandan yo tap poze pou fotograf yo nan Grant Otèl Pèp la nan Peken (Mèkredi 4 desanm 2013).
Vis Prezidan ameriken an, Joe Biden, twouve l nan Peken pou kèk chita-tande ki pral santre, san di petèt, sou desizyon Lachin pran pou l ajoute sou tèritwa nasyonal li kèk zile ki an diskisyon ant li-menm ak Japon, aprè Peken te deklare zile sa yo antre nan kad defans ayeryen li.

Misye Biden debake nan kapital Lachin nan byen bonè mèkredi 4 desanm 2013 la e li pwomèt pou l soulve kesyon an nan rankont Ii ak Prezidan Xi Jinping e ak lòt lidè chinwa yo. Pandan Vis Prezidan ameriken tap pale ak kòlèg chinwa l la, Li Yuanchao, an prezans laprès, li fè konnen relasyon ki egziste ant Lèzetazini ak Lachin yo se relasyon ki enpòtan, menm si yo konplike. Vis-prezidan Biden di:

« Relasyon sa yo genyen yon gwo kokenn enfluyans e yap afekte trajektwa lemond pral swiv pandan tout 21èm syèk la. E, tankou tout relasyon ki konplike, Vis Prezidan Li, yo mande yon angajman soutni e toujou nan pi wo-nivo a. Se pou sa prezidan ameriken an te mande m vin isit la e se yon onè pou m twouve m isit la. »

Vis Prezidan ameriken an ap fè vwayaj sa a yon jou aprè li te ale nan peyi Japon, yon alye Lèzetazini kote Misye Biden te deklare –nap site : « Mwen genyen gwo preokipasyon poutèt Peken pran desizyon pou l ajoute zile ki nan rejyon Lanmè Lès Lachin nan anndan espas defans ayeryen li.» fen sitasyon.

Aprè Vis Prezidan Biden te fin rankontre ak Premye Minis japonè-a, Shinzo Abé, li te lanse lide pou 2 pati konsène yo travay pou yo tabli yon atmosfè konfyans resipwòk; pami dispozisyon yo ta dwe pran, daprè Misye Biden, genyen etablisman yon kanal kominikasyon dijans ki ta kapab ede bese tansyon kap monte ant 2 kapital azyatik yo.
XS
SM
MD
LG