Accessibility links

Repiblik Dominikèn/Imigrasyon: Dekrè Prezidansyèl sou Sò Plizyè Milye Swa-Dizan Imigran Ilegal

  • Ekip Sèvis Kreyòl VOA

Repiblik Dominikèn
Prezidan dominiken an, Danilo Medina, pibliye samdi 30 novanm 2013 la yon dekrè ki anonse yon pwosesis natiralizasyon espesyal pou etranje kap viv nan peyi a san dokiman legal ak pitit yo ki te pran nesans sou teritwa dominiken an.

Dapre dekrè a, imigran sa yo gen 18 mwa pou yo regilarize estati yo. Dokiman sa a parèt apre tribinal konstitisyonèl peyi a te adopte, nan dat 23 Septanb 2013 la, yon desizyon pou l elimine sitwayènte dominikèn tout moun ki te pran nesans sou teritwa dominiken an apre ane 1929 si paran yo tap viv ilegalman nan peyi a.

Dokiman an, ki rele « Plan Regilarizasyon Nasyonal pou Etranje » e ki gen 39 atik, divize imigran yo an plizyè kategori, tankou sa ki se rezidan pèmanan ak sa ki gen rezidans tanporè. Plan an pran an konsiderasyon ti moun ki te pran nesans sou teritwa dominiken an ; kapasite yon imigran pou l eksprime li e ekri espayòl ; nivo edikasyon li ; eske li posede byen imobilye nan peyi a ; eske l ap travay ; ki sitiyasyon finansye li ak dosye kriminèl li.

Pouvwa Egzekitif dominiken an pral soumèt plan an devan palman an pou apwobasyon nan semèn k ap vini la yo. Dapre dekrè a, pap gen depòtasyon pandan peryòd 18 mwa swadizan imigran yo genyen pou yo regilarize estati yo. Moun desizyon sa a afekte e ki pa chache ranpli kondisyon yo pandan peryòd 1 nan edmi an, kapab mande volontèman pou otorite yo voye yo toune nan peyi yo (?), ou byen yap sibi depòtasyon. Dekrè a pa presize ki kondisyon yon moun afekte dwe ranpli avan pou l vin sitwayen dominiken.

Gouvènman Prezidan Danilo Medina a te anba anpil presyon kominote entènasyonal la ki mete an kesyon legalite desizyon tribinal konstitisyonèl la ki kapab afekte plis pase 200 mil moun ki gen orijin ayisyèn.

Ansyen Minis ayisyen kap viv nan Dyaspora a e ansyen konsil jeneral Ayiti nan Santo Domingo, Edwin Paraizon, kap dirije yon òganizasyon ayisyano-dominikèn nan peyi panyòl, byen akeyi plan regilarizasyon an, menm si li gen kèk rezèv sou kontni dekrè prezidansyè la.

Klike sou « Koute » pou w tande ekstrè yon entèvyou Misye Paraison bay Jean Robert Philippe.
XS
SM
MD
LG