Accessibility links

Somè Dèzamerik la, daprè Minis Afè Etranjè Kolonbi a, Maria Angela Holguin


Minis Holguín (a goch) nan yon rankont avèk Sekretè Deta Hillary Clinton.
Minis afè etranjè kolonbyen an, Maria Angela Holguin, bay laprès lendi maten yon entèvyou kote li di diskou Prezidan Juan Manuel Santos, lidè pey iòganizatè Somè Dèzamerik la, fè dimanch 15 avril la nan fen seyans yo, sèvi kòm sa li rele <<Dokiman Final Katajènnan>>an absans yon deklarasyon final, yon kominike konjwen ki nòmalman toujou sanksyone finisman yon randevou entènasyonal konsa. Nan entèvyou sa a, chèf diplomasi kolonbyèn nan kouvri plizyè pwe, tankou:

-Oganizasyon somè a,
-Eske li atenn objektif li
-Konbe li koute gouvènnman kolonbyen an an plis kontribisyon peyi patnè li yo nan l´OEA, òganizasyon ki nan tèt somè a;
-Poukisa li fini san yon tradisyonèl deklarasyon final e kijan moun dwe entèprete absans yon dokiman ofisyèl ki sanksyone fen diskisyon ki fèt ant manm diferan delegasyon yo nan Katajèn.

Madam Holguin di moun kapab jwenn repons kèk nan kesyon sa yo –si se pa tout- nan diskou Prezidan Santos la. Nap site chèf diplomasi kolobyèn nan:

<<Deklarasyon Prezidan Santos la -ki se dokiman ofisyèl somè a- genyen ladan n manda ak tout tèm delege yo te prepare nan travay yo te fè pandan tout yon lane. Pa gen anyen nan sa n te prepare a ki pèdi. Natirèlman, fò m di se yon seri de sijesyon, yon seri de pwopozisyon nou mete devan chak peyi pou yo aplike si yo vle; pwopozisyon yo pa gen fòs de lwa; se pa plan ki obligatwa, menm jan sa toujou fèt nan l’OEA.

<<E tout tèm nou devlope yo, li fondamantal pou nou kontinye travay sou yo, chache aplike yo, paske sa kapab pote yon gwo apui nan efò kap fèt pou amelyore kalite lavi moun. Nou ka jwenn tou sa nan diskou Prezidan Santos la.

<<Diskousa a se yon apèl pou n respekte prensip de baz òganizasyon nou an, jan sa toujou fèt nan somè tankou pa nou an ak nan òganizasyon ki reyini divès peyi; se yon apèl pou nou pran an konsiderasyon diferan tèm nou abòde yo (pami yo, genyen kesyon tankou Kiba ak kesyon Malwin nan. >>

Lè laprès mande Madan Holguin kisa ki te manke, ki eleman ki te absan nan deba yo, kif è somè a pa rive debouche sou yon deklarasyon final? Li bay repons sa a:

<<Ebyen, nou te prèt pou jwenn yon deklarasyon final. Mwen panse sa nou te manke, se yon jou an plis pou nou menm, minis afè etranjè yo, te kontinye travay. Ekip teknik nou yo te rive nan yon moman kote yo te fè n konnen nou te prèt pou jwenn yon konsansis, dapre jan diskisyon yo tap evolye; yon kansansis sou yon rezolisyon final. Mwen panse si nou te genyen yon jou an plis, petèt yon demi jounen an plis, nou ta ka rive jwenn yon antant sou yon deklarasyon final.>>

Laprès kolonbyèn rapòte òganizasyon somè a koute ant 90 e 100 milyon dola ameriken.Madam Holguin pa konfime ni demanti chifsa a; sepandan li di anvan fen semèn nan li va kapab bay detay presi sou depans ki te nesesè pou mete rankont 2 jou a sou pye.

Kidonk, dapre chèf diplomasi kolonbyèn nan, randevou Katajèn nan se yon match ki fini twò bonè; si li menm ak kolèg li yo, lòt minis afè etranjè yo, te genyen plis tan devan yo, yo tap rive make gòl ki rele <<deklarasyon final la>>.

Nap raple prezidan 4 peyi sou kontinan an pat prezan nan somè a: Se Prezidan ayisyen an, Michel Martelly, ki fèk sibi yon operasyon nan zèpòl nan Miami; Prezidan Hugo Chavez (Venezuela) ki gen kansè e ki twouve l jodi a ankò nan Kiba pou plis terapi; Prezidan Daniel Ortega (Nikaragwa), avèk Prezidan Rafael Correa (Ekwatè) ki, li menm, te anonse li tap boykote 6èm Somè Dèzamerik la pou l pwoteste kont le fèt ke Kiba pat gen envitasyon pou li te patisipe nan randevou Katajèn nan.

J. Lyonel Desmarattes
Anvwaye espesyal Sèvis Kreyòl VOA
Katajèn, Kolonbi.
16 avril 2012.
XS
SM
MD
LG