Accessibility links

Somè Amerikano-Pakistanè nan Washington: Barack Obama ap Resevwa Nawaz Sharif

  • Ekip Sèvis Kreyòl VOA

Premye Minis pakistanè a, Nawaz Sharif.
Premye Minis peyi Pakistan an, Nawaz Sharif, ap vizite La Mezon Blanch mèkredi 23 oktòb 2013 la, pou li fè chita-tande avèk Prezidan Barack Obama. Obsèvatè yo atann yo aske 2 lidè yo fikse atansyon yo pandan rankont sa a sou atak Lèzetizini lanse kont militan teworis yo sou fwontè Pakistan avèk Afganistan –atak kote lame amerikèn itilize avyon telegide, sètadi aparèy ki pa gen moun ladan yo.

Mwa pase a, pandan Misye Sharif te pran lapawòl devan asanble jeneral Oganizasyon Nasyon Zini an nan New York, li te deklare lit kont teworism nan dwe respekte prensip entènasyonal yo. Depi kèk tan deja, atak avèk avyon telegide yo tounen yon senbòl ki montre enkapasite gouvènman pakistanè a pou l kontwole pwòp espas ayeryen li, daprè pwofesè Akbar Akmèd, kap anseye relasyon entènasyonal nan American University nan Washington. Nan jounen madi 22 oktòb la, sekretè laprès Mezon Blanch la, Jay Carney, te defann pratik sa a. Misye Carney te di:

« Lèzetazini pa lanse atak mòtèl lè li-menm ak patnè li yo gen lòt posiblite pou yo mete men sou teworis yo. »

Sepandan, sanble administrasyon Obama a pran dispozisyon pou l diminye itilizasyon avyon telegide yo nan lit kont teworism nan. Gen siyn ki montre tou gouvènman ameriken an vle repare dega yo. Se konsa, pi bonè mwa sa a li te mande Kongrè a mete plis pase yon milya dola asistans a la dispozisyon Pakistan.

Pandan Sekretè Deta John Kerry tap rankontre ak Premye Minis Nawaz Sharif anvan vizit mèkredi a nan La Mezon Blanch la, li te pale klè pou l di Washington gen yon fèm volonte pou l ranfòse rapò li avèk Islamabad Misye Kerry fè konnen :

“Relasyon nou avèk Pakistan genyen yon enpòtans ekstwòdinè. Deja pou youn, se yon demokrasi kap redi pou l devlope ekonomi li e fè fas ak yon mouvman rebelyon; epi Pakistan enpotan tou pou estabilite rejyonal la.”

Pou sa ki gen rapò ak atak avèk aparèy telegide lame amerikèn ap lanse nan Pakistan yo, Lèzetazini pa tèlman bay enfòmasyon piiblik sou tip operasyon sa yo. Sepandan otorite yo nan Washington fè konnen se atak ki fèt aprè anpil planifikasyon pou yo pa fè viktim pami popilasyon sivil la; epi, dayè, atak sa yo rive elimine anpil militan rezo teworis al-Kayda a.
XS
SM
MD
LG