Accessibility links

Etazini-Kriz Dèt Nasyonal la : Yon Solisyon Sanble Posib Finalman

  • Ekip Sèvis Kreyòl VOA

Manifestan ameriken kap pwoteste ak yon pannkat ki di "Fèmen sètafè de fèmen gouvènman an."
Lèzetazini sanble l ap fè premye pa sou wout pou l ranfòse kapasite li pou l prete lajan yon fason pou l pa twouve li nan enposibilite pou l respekte obligasyon fiskal li.

Lamezon Blanch anonse, jedi 10 oktòb 2013 la, Prezidan Barack Obama jwenn bon jan “ankourajman” nan yon òf lidè repibliken nan Chanm Depite a fè pou yo leve, pou yon peryòd 6 semèn, plafon dèt la ki twouve l jounen Jodi a nan nivo 16 mil milya 700 milyon dola. Si plafon dèt sa a pa ogmante nan 6 jou --swa fen jounen 17 oktòb kap vini la a- Lèzetazini ap rive nan yon pwen kote li pap gen lajan pou l peye dèt li.

Pami palmantè repibliken ki apiye pwopozisyon sa a, genyen kèk nan depite ki pi fawouch nan opozisyon yo kont prezidan Obama. Pòtpawòl La Mezon Blanch la, Jay Carney, di òf Repibliken yo fè a sanble montre yo rekonèt li enposib pou peyi a twouve l nan yon sitiyasyon kote li pa kapab fè fas ak obligasyon li. Misye Carney di:
« Prezidan Obama kontan deske sanble manm Chanm Depite a fin pa gen tèt fret e sanble yo rekonèt omwen li pa posib pou Lèzetazini twouve li “nan enkapasite pou l peye dèt li.”

Jay Carney kontinye pou l di Prezidan Obama ka aksepte yon akò a-kou-tèm pou gouvènman an ogmante limit dèt la depi pa gen kondisyon ki makonnen ak pwopozisyon sa a.

Men yon lòt pwoblèm finansye e politik rete poze nan Washington: se fèmti pasyèl gouvènman federal la ki antre nan 11èm jou li, san moun poko wè ki kote yon solisyon ap sòti. Prezidan Chanm dè Reprezantan an, John Boehner --ki te pami preske 2 douzèn depite repibliken parèy li ki te rankontre ak Prezidan Obama pandan 90 minit jedi nan La Mezon Blanch-- mande kòlèg li yo apiye ogmantasyon plafon dèt la rive jous nan dat 22 novanm 2013 la, yon fason pou Lèzetazini kapab prete lajan pou l peye echeyans finansye li, a kondisyon pou Misye Obama sèvi ak tan sa a pou li negosye avèk yo sou kesyon depans Leta federal la, anvan pou yo aksepte relouvri gouvènman an.
XS
SM
MD
LG