Accessibility links

2èm Rankont nan 2 Jou ant Negoyatè Lapè Izrayelyen ak Palestinyen nan Washington.

  • Ekip Sèvis Kreyòl VOA

Otorite israyelyen ak palesitinyen ap rankontre pou yon 2èm fwa nan 2 jou nan Washington, nan kad efò yap fè pou yo eseye avanse avèk negosyasyon lapè yo.
Prezidan ameriken an, Barack Obama, rankontre an prive, nan La Mezon Blanch, madi 30 jiyè 2013 la, avèk negosyatè izrayelyen ak palestinyen, yon jou aprè 2 pati yo te fè premye chita-tande dirèk yo nan preske 3 zan.

Moun pa konnen egzakteman sou kisa Misye Obama pale avèk minis jistis izrayelyen an, Tzipi Livni (ki se prensipal negosyatè Izrayèl la) e avèk negosyatè no. 1 palestinyen an, Saeb Erekat, nan rankont la ki dewoule ak tout pòt-fèmen. Nouvèl la di rankont sa a pat sou kalandriye aktivite ofisyèl lidè ameriken an.

Lendi 20 jiyè a, kèk èdtan anvan 2 delegasyon yo te rankontre nan Washington, Madam Livni te fè yon chita-pale nan New York avèk Sekretè Jeneral Òganizasyon Nasyon Zini an, Ban Ki-moon. Daprè sa prensipal negosyatè Izrayèl la di, genyen mefyans nan 2 kan yo; men li dispoze travay pou elimine yo. Madam Livni deklare:

“Genyen anpil espri sinik, mefyans ak pessimism; men, an menm tan tou, genyen espwa. Mwen kwè, pa le fèt ke nap relanse negosyasyon yo, nou kapab kreye espwa ni pou izrayelyen, ni pou palestinyen.”

Daprè madam Livni, negosyatè yo pap fikse atansyon yo fwa sa a sou dosye ki gen rapò ak lizyè fwontyè ant Izrayel ak yon posib eta palestinyen; men pito sou mwayen pou yo mete fen nan konfli a.

Si 2 pati yo kapab genyen negosyatè ki fas a fas jounen jodiya aprè 3 zan, se, an gwo, rezilta navèt diplomatik Sekretè Deta ameriken an, John Kerry, te fè nan rejyon Mwayen Orayan an. Misye Kerry --ki te òganize yon dine ofisyèl pou manm 2 delegasyon yo lendi swa-- pale pou l di li rekonèt chita-pale yo pap fasil ditou. Sekretè Deta Kerry di:

« Se pa yon sekrè pou pèsonn ke anpil difikilte ap tann negosyatè yo ak lidè yo pi devan… pandan nap chache konpwomi ki rezonab sou kèk kesyon difisil, konplike, emosyonèl e senbolik. Mwen panse konpwomi rezonab dwe reprezante eleman santral la nan efò nap fè la a. »

Daprè analis yo, negosyasyon Washington yo reprezante yon pa an avan; sepandan yo fè konnen chans pou 2 pati yo rive jwenn yon lapè veritab --oubyen menm yon akò dirab-- ap rete mens toutotan ke izrayelyen ak palestinyen pa kapab antann yo sou kesyon pou konnen ki fwontyè ki pral separe 2 Eta yo.
XS
SM
MD
LG