Accessibility links

George Alexander Louis : Se Non Nouvo Manm Fanmi Wayal Britanik la

  • Ekip Sèvis Kreyòl VOA

Prens William ak madanm li, Catherine, pandan yo te parèt avèk ti bebe yo a devan Lopital St. Mary, nan sant vil Lond. (Foto:; 23 jiyè 2013).
Tout devinèt fini. Non nouvo eritye twòn wayal britanik la se George Alexander Louis.

Yon jou apre bebe wayal la, pitit-gason Dik William ak Dichès Catherine, te fè parèt li sou latè, li gen tan okipe yon bèl plas sou premyè paj jounal nan lemond antye sou toto ki montre li nan bra manman l, Kate. Li se 3e nan siksesyon liye wayal la.

Se yon koup wayal la kontan e fyè ki te prezante ti bebe a bay reprezantan medya entènasyonal ki te mase devan lopital Saint Mary a, nan vil Lond. Prens William te prezante devan laprès kòm yon papa kontan e fyè pou l deklare :

« Bebe a genyen 2 bon poumon…sa se sèten. Li se yon gwo gason ; ki peze lou anpil. Sepandan, nou toujou ap travay pou nou jwenn yon non pou li le pi vit posib… A la verite, se premye fwa lopital la kite nou wè l e nou panse nap gen tan pou nou ratrape nou. »

Bò kote pa l, Dichès Cambridge la, Kate, di se ak fyète lap viv yon moman ke tout nouvo papa pitit, tout nouvo manman pitit kapab konprann :

« Se yon moman ki ban m anpil emosyon; se yon moman espesyal ; mwen panse santiman map viv la a, se santiman nenpòt ki paran konnen. »

Yon ti tan apre, yon machinn wayal te parèt, e Prens William te kòmanse jwe wòl papa l. Li mete ti bebe a nan ti chèz li nan machin nan kote koup la pran direksyon nouvo kay fanmi an. Menm lè a, selebrasyon te deja gaye nan tout Grann Bretay. Klòch Abeyi Westminster la, kote William ak Kate te marye an 2011, te karyonen pandan 3 zè-d-tan nan tout kapital la.

Palè Kensington nan, kote Prens William te grandi, se chato kote bebe George Alexander Louis pral grandi tou. Fanmi wayal la depanse yon milyon 500 mil dola pou l renove youn nan apatman yo ki genyen 21 chanm --pami yo gen youn ki la pou ti moun nan apann fè desen.

Nan jou kap vini la yo, Prens William ak Kate pral mennen ti bebe a kay lafami Middleton, swa fanmi Kate --ki donk lakay gran papa ak grann ti gason an, kote ti eritye wayal la pral rete byen lwen medya yo pandan yon bon ti tan.
XS
SM
MD
LG