Accessibility links

Ejip - Politik: Nouvo Premye Minis la ap Travay sou Fòmasyon Kabinè Li

  • Ekip Sèvis Kreyòl VOA

Nan peyi Lejip, nouvo premye minis pwovizwa a, Hazem el-Biblawi, kòmanse travay mèkredi 10 jiyè 2013 la pou l fòme kabinè li kote, daprè medya leta a, li pral envite manm pati Frè Mizilman yo ak pati islamis Nour la.

Otorite pwovizwa yo ap prese pou yo reyalize yon tranzisyon politik kap gen ladan n amandman konstitisyon an epi òganizasyon eleksyon lejislatif ak prezidansyèl.

Sepandan, nouvèl yo fè konnen pati islamis Nour la mete l an kwa devan fòmasyon yon gouvènman pwovizwa, e li mande lame kite Prezidan Mohamed Morsi retounen nan plas li.

Nap raple lame ejipsyèn nan fè konnen si l te pase alaksyon pou l ranvèse Prezidan Mohamed Morsi sa gen 8 jou, se paske sa te nesesè pou l respekte volonte plizyè milyon moun ki tap pwoteste pou mande demisyon prezidan an.

Nan Washignton, pòtpawòl Depatman Deta a, Jen Psaki, deklare madi 9 jiyè a Lèzetazini rete an kontak ak Pati Frè Mizilman yo e gouvènman ameriken an ankouraje l pou l patisipe nan pwosesis tranzisyon an. Daprè Madam Psiki, tout pati ta dwe gen plas yo bò tab tranzisyon an.

“Se yon ankourajman pou nou, lè nou wè gouvènman pwovizwa a prepare yon plan pou peyi a ale de lavan. E, natirèlman, tout plan pou peyi a ale de lavan dwe gen plas pou tout moun e pran mo « konsansis » la an konsiderasyon."

Pòtpawòl Jen Psaki kontinye pou l di administrasyon Obama a kontinye analize done yo pou l konnen si evennman ki te debouche sou ranvèsman Presidan Mohamed Morsi a se yon kou-deta militè; paske, sou plan legal, sa kapab genyen konsekans sou avni asistans Lèzetazini ap bay Lejip.
XS
SM
MD
LG