Accessibility links

Deba sou Nouvo Pwojè-Bidjè Prezidan Obama pou Ane Fiskal 2014 la

  • Ekip Sèvis Kreyòl VOA

Sou foto sa a (8 avril 2013), nou wè kopi plan bidjè Prezidan Barack Obama pou ane fiskal 2014 la. Yo pare pou livrezon nan lokal Près Nasyonal Lèzetazini an nan Washington, DC.
Nan Washington, Prezidan Barack Obama pral soumèt devan kongrè a, mèkredi 10 avril 2013 la, yon pwojè-bidjè ki deja rankontre opozisyon bò kote lidè repibliken yo nan Kapitòl la e pwovoke mekontantman nan mitan demokrat liberal yo.

Se yon bidjè konpwomi kote, pa egzanp, prezidan an aksepte diminye benefis pou granmoun aje kap resevwa lajan sekirite sosyal yo. Nan fen semèn pase a, nan mesaj Misye Obama mete devan pèp la chak weekend, li te rekonèt ke avèk plan sa a li pap atenn objektif li te genyen pou l redui defisi a epi relanse ekonomi an. Prezidan an di:

« Menmsi se pa plan ideyal mwen te genyen pou m redui defisi a plis toujou, se yon konpwomi mwen dispoze aksepte yon fason pou nou depase yon etap kote se solisyon a kou-tèm sèlman nou genyen, kote nap pran desizyon pou n jere kriz sèlman. »

Konpwomi Prezidan Obama fè pou l kapab rankontre repibliken yo a mi-chemen, pwovoke kòlè nan mitan branch pwogresis pwòp pati li a e nan sen demokrat liberal yo. Nan yon mouvman pwotestasyon ki dewoule devan La Mezon Blanch madi 9 avril la, senatè endepadan Bernie Sanders fè konnen li pral vote kont pwojè-bidjè prezidan an e li menm deja lanse yon petisyon kont plan an. Senatè Sanders deklare :

“Lè Obama te kandida a la prezidans an 2008, li te di li pap janm koupe sou benefis sekirite sosyal yo. Nou vle fè prezidan an sonje sa l te pwomèt la, pou l pa retounen sou pawòl li. »

Pandansetan, sanble repibliken yo pa genyen yon tèlman bon opinyon nesesèman sou pwojè-bidjè Prezidan Obama ap voye devan kongrè a. Pa egzanp, pandan lidè minorite a nan Sena a, Mitch McConnell, te pran lapawòl nan gran kò a madi, li di li pa tèlman kwè ke Prezidan an ale lwen ase nan efò repibliken yo mande l fè pou gouvènman an koupe sou depans leta federal la.
Senatè McConnel di :

"Nou tande dokiman an genyen ladan n yon ogmantasyon taks, li genyen taks adwat, li genyen taks agoch. Epi, tout rediksyon defisi mwen mansyone yo, pral sòti nan yon bann ak yon pakèt ogmantasyon taks, olye yo sòti nan reduksyon depans yo."

Kèk repubiken pale pou yo fè sonje, nan yon akò sou bidjè a yo te siyen nan mwa janvye 2013 la, yo te deja aksepte kèk ogmantasyon taks; e yo ensiste pou di tout nouvo konpwomi fèt pou chita sou rediksyon depans yo sèlman.

Prezidan Obama ap ofri mèkredi swa yon dine kote anpil repibliken pral reponn prezan, pou l kapab chache elimine diferans ki egziste ant 2 pati yo. Tou 2 chanm yo (sena a ki anba kontwòl demokrat yo, ak chanm bas la ki anba kontwòl repibliken yo) deja pase 2 plan bidjè diferan. Plan chanm bas la ta kapab ekilibre bidjè a; pou sa, li tap genyen, antwòt, pou l elimine plan refòm prezidansyèl nan sistèm swen sante ki te antre an aplikasyon an 2010 la. Kanta pou plan sena a, li pa tap ekilibre bidjè a, e nouvo pwojè prezidan Obama a pap ekilibre li non plis.
XS
SM
MD
LG