Accessibility links

Bilan Pwovizwa Pasaj Siklòn Sandy nan Karayib la: 21 Mò

  • Ekip Sèvis Kreyòl VOA

Siklòn Sandy pase avèk raj sou il Bahamas kote Ii kase poto elektrik e li kraze wout; men nouvèl yo pa pale de moun ki ta mouri.

Anvan li te rive nan Bahamas, siklòn nan te koze lanmò 21 moun pandan li t ap deplase nan direksyon nò sou Oseyan Atlantik la.

Lè move tan an te rive Kiba jedi 25 oktòb a, li te pote avèk li van ki t ap soufle ak yon fòs 170 kilomèt a lè, li kraze kay, dekole tètkay epi li touye 11 moun.

Reinaldo Rivas, k ap viv nan vil Santiago de Cuba, youn nan zòn kote move tan fè plis dega ak plis viktim nan peyi a, deklare:

“ Siklòn nan te gwo nèg anpil. Mwen genyen 54 tran sou tèt mwen; mwen pat janm wè yon bagay konsa anvan. Se yon bagay tèrib; ou te wè tètkay k ap vole pasi, pala. Sete yon bagay tèrib, paske siklòn nan te gwo anpil-anpil."

Siklòn Sandy koze lanmò tou nan peyi d Ayiti ak La Jamayik kote inondasyon fè gwo dega nan tou lè 2 peyi yo. Espesyalis meteo Gloria Ceballos pale pou l di Sandy ap pase yon lòt jou ankò ap vide lapli sou il Ispanyola, swa sou peyi d Ayiti ak Repiblik Dominikèn. Li ajoute -nap site:

"Sistèm presipitasyon yo montre ke sitiyasyon an pral kontinye vandredi menm jan li te ye jedi; epi samdi entansite siklòn nan, sitou lapli a, pral bese."

Daprè analiz espesyalis yo fè sou òdinatè, siklòn nan gen pou l tounen yon tanpèt lè li va rive sou kòt ès Lèzetazini semèn pwochèn nan, kote li va pote gwo van ak lapli glase.

Sandy se 18èm non yo bay siklòn ki pran nesans sou Oseyan Atlantik la ane sa a --ki se yon ane trè zaktif pou yon sezon ki te kòmanse le premye jen e k ap pran fen nan dat 30 novanm pwochèn.
XS
SM
MD
LG