Accessibility links

Venezuela/Eleksyon: Hugo Chavez Ranpòte yon Lòt Manda 6 Zan

  • J. Lyonesl Desmarattes

"Se yon jounen memorab; se pou sa mwen di nou mèsi ak tout kè mwen, e mwen priye Bondye pou Li ban mwen lavi ak sante". Hugo Chávez
Nan eleksyon prezidansyèl ki dewoule dimanch 7 oktòb 2012 la nan peyi Venezuela, Hugo Chavez rapòte yon lòt manda 6 zan sou pouvwa a. Responsab yo nan Komisyon Elektoral la deklare misye Chevèz venkè byen ta nan sware jounen elektoral la.

Hugo Chavez –ki se yon ansyen kolonèl nan lame venezuelyèn nan-- bat kandida ki te an fas li a, ansyen gouvènè Henrique Capriles, avèk yon rezilta ki bay prezidan an plas la plis pase 50 pou san vwa yo. Misye Capriles pat pran tan pou l rekonèt defèt li epi prezante felisitasyon n bay misye Chavez. Henrique Capriles di –nap site:

“Mwen gen konviksyon peyi sa-a kapab pi bon ; wi, m gen konviksyon Venezuela kapab pi bon. Mwen vle remèsye tout travayè electoral yo, tout moun ki te travay pandan tout mwa sa yo, tout moun ki travay jodiya, yo tout san distengsyon. Mwen voye rekonesans mwen ak apresyasyon m ba yo. Se konsa tou mwen vle remèsye lòt kandida a, Prezidan Repiblik la. Mwen voye tout felisitasyon m ba li, e mwen ta renmen pou l tande vwa pèp nou an ki pale jodi a. Nou genyen devan nou la a yon peyi ki gen 2 vizyon diferan. Si w s on bon prezidan, ou dwe travay pou tout venezuelyen ; se pou w travay pou solisyon pwoblèm tout venezuelyen. »

Aprè komisyon elektoral la te fin anonse viktwa Hugo Chavez la, patizan n yo te pran lari nan kapital la, Caracas, kote yo tire fe-datifis pou yo selebre viktwa sa a. Nan diskou Misye Chavez fè kòm venkè eleksyon an, li pwononse kèk pawòl ankourajman ak apresyasyon pou patizan Misye Capriles yo. Mesye Chavez pale pou l di –nap site tou:

“Mwen voye mo rekonesans mwen bay tout sila yo ki pat vote pou nou. Mwen gen apresyasyon espesyalman pou talan demokratik yo, pou patisipasyon yo, pou manifestasyon santiman sivik yo jounen jodi a, menmsi yo pa dakò avèk ideoloji bolivaryèn nou an.”

Daprè analis yo, eleksyon dimanch la te reprezante pi gwo tès politik pou Hugo Chevez depi preske 14 zan li genyen sou pouvwa a. Henrique Capriles te elektrifye yon gwo pati nan elektoral venezuelyen an ak yon kanpay pòt-a-pòt kote li te kritike gouvènman Chavez la pou anpil bagay ki, daprè li, pap mache o Venezuela –sitou pou blackout ki gaye souvan nan plizyè vil, manje ki pa genyen pafwa, ak yon gwo kantite asasina kap fèt nan peyi a.
XS
SM
MD
LG