Accessibility links

Sekretè Deta Hillary Clinton ap Vizite Lachin

  • Ekip Sèvis Kreyòl VOA

Sekretè Deta Ameriken an, Hillary Clinton
Sekretè Deta ameriken an, Hillary Clinton, sou wout pou Peken, kapital Lachin, kote li pral abòde, antwòt, dosye limit fwontyè maritim ant Lachin ak vwazen l yo.

Chèf diplomasi amerikèn nan pwomèt pou l pran yon pozisyon dyanm sou dosye a e mande pati konsène yo chache jwenn yon solisyon pou mezantant ki egziste antre yo konsènan limit fwontyè yo nan Lanmè Lachin Meridyonal la.

Ralph Cossa, se yon analis kesyon sekirite nan Fowòm Pasifik la ki baze sou zile Hawahi. Li pale ak Lavwadlamerik pou l di pa tèlman gen anpil chans pou yon konfli ouvè pete ant Lachin ak vwazen l yo konsènan limit maritime yo.

Sepandan, Misye Cossa ensiste pou l di, daprè li menm, pa tèlman gen chans non plis pou Madam Clinton rive fè gwo pwogrè nan efò Lèzetazini ap deplwaye pou pati konsène yo aksepte yon mach-a-suiv moral -yon sòt de kòd de konduit- pou yo chache jwenn yon solisyon pasifik pou pwoblèm yo.

Misye Cossa deklare:
“Mwen pesimis anpil sou kesyon pou konnen eske yap rive tabli yon « kòd de konduit » ki fè sans. Nan yon sèten moman, byen kapab genyen yon bagay ki rele “yon kòd, yon mach-a-swiv”. Men mwen doute pral genyen yon mekanism verifikasyon kap pèmèt moun wè jiska ki degre pati konsène yo pral respekte angajman yo. San sa, se pral tou senpleman yon moso papye an plis moun pral vyole san pwoblèm.”

Sekretè Deta Clinton debake nan Peken madi 4 septanm 2012 la.
XS
SM
MD
LG