Accessibility links

Siri-Vyolans: Batay yo Kontinye nan vil Alèp ak lòt kote nan peyi a


Sòlda Lame Lib Siryèn nan ap goumen nan vilaj Anadan, sou yon distans 16 kilomèt ak vil Alèp -- 30 jiyè 2012.
Nouvèl konsènan Siri: Militan opozisyon an fè konnen batay gaye pa si pa la madi 31 jiyè 2012 la nan peyi a, san bliye nan Alèp, pi gwo vil nan Siri. Daprè Obsèvatwa Siryen pou Dwamoun nan --ki gen baz li nan vil Lond, ann Angletè-- fòs gouvènmantal yo ap vide gwo kout zam lou sou divès katye nan Alèp, tandiske sòlda ap goumen atè ak rebèl divès kote nan vil la. Se konsa tou militan yo di goumen ap dewoule nan vil Damas, kapital la, ak nan pwovens Homs. Sekretè Jeneral Oganizasyon Nasyon Zini an, Ban Ki-moon --ki tap pale de sitiyasyon an lendi-- deklare li geny gwo kè-sote akoz kanpay bonbadman ak gwo zam fann-fwa lame siryèn nan ap lanse sou popilasyon sivil la. Chèf l’ONU an di –nap site:

“Anvwaye espesyal l’ONU ak Lig Arab la, epi mwen menm tou, nou genyen kè-sote pou sitiyasyon an nan Alèp. Akoz vyolans kap dewoule nan vil sa a, yon gwo kantite moun deja pati kite kay yo. Konsekans grav gwo bonbadman yo genyen, itilizasyon gwo zam lou sou popilasyon sivil la nan Alèp ak lòt kote ankò, ban nou preokipasyon seryezman.”

Misye Ban kontinye pou l lanse apèl bay prezidan siryen an, Bashar al-Assad, pou mande misye pwomèt li pap itilize zam chimik nan okenn sikonstans. Nan menm jounen lendi a, Foreign Office la (kidonk, Depatman Afè etranjè britanik la) te fè konnen pi gwo diplomat siryen an nan La Grand Bretay, Chaje Dafè Khaled al-Ayoubi, vire fizil depòl –kidonk li kite kan gouvènman Assad la pou l antre nan opozisyon an. Konsa misye tounen dènye gwo ofisyèl an dat ki leve-kanpe pou pwoteste kont operasyon sere-boulon rejim siryen an ap lanse kont opozisyon an. Otorite britanik yo di Misye al-Ayoubi fè Foreign Office la konnen li pa reprezante gouvènman Assad la ankò.
XS
SM
MD
LG